Aiti ka kompeni ha ki sengbhalang; na ka tih surok, poi sha ka tih maw ha Rngain

U lum, uba lah ban khyllem ha kano kano ka minit bad utei u don ha
syndah jong u lum, uba dang shu dep twa ha ka Sngi Thohdieng.

Da U Bah RM Shabong
Ka jinghap khyndew bad ki phew tylli ki mawbah, kiba heh kat ki trok ha Riat Rngain, ha ka janmiet sngi thohdieng, ka la wan rah ia ka phieng ka ngiew sha ka thain Riwar Mihngi hi baroh kawei, kaba la wan rah ruh ia ka jingduh noh ar ki mynsiem briew, uwei uba na Wahlyngkhat bad uwei uba na Wahkhen.

Une u nongthoh, ula leit ju rip, ha ka sngi saitjain, sha katei ka jaka bad shwa ban poi ha katei ka jaka, la iohi, ia ki heh pulit, ba ki da smat tasam, ban bthah ia ki paidbah, ba kim dei ban leit tur shajan bad ki da khang ban iaid da ki kali ruh, ba ka pynkhapngiah ia katei ka jaka bad katei ka jingbthah, ka la pynlong ia une u nongthoh, ba un hap iaid da ka kjat, kumba 10 minit antad. Mar ia poi tok, ha katei ka jaka, la iohi, ia ka bos pulit, kaba ieng ha syndah jong ka jaka ba twa khyndew bad ka dei katei ka kali, kaba kit ia ki pulit jong ka State Disaster Response Force (SDRF) bad la iohi, ba nalor ka khyndew, ki don sa ki mawbah, kiba da ki phew tylli, kiba la ban ia katei ka surok bah, ha ka bynta kaba khim bha, hajan ka jaka tih maw bad nangta sa ka riat kaba jrong bah, kaba dei ka jaka, ba ka leit hap ka kali, ba u shong U Rangbah Shnong, ka Wahlyngkhat bad lait nangta, sa ki riew paidbah, kiba ieng lyngngoh ha baroh ar liang ka riat, namar ba ki shah khang lynti bad ba ka thnem ka jingpyrkhat jongki, halor katei ka jingjia kaba sngewtriem shibun.

Ha ka jinglap jong une u nongthoh, la iohi, ba ka daw jong ka jingtwa, ka dei na ka jingtih khlem akor, ia ka sharing jong katei ka surok, kaba don da ki maw bah bad na ka jingpynkhih ba man ka sngi, da ki mashin JCB bad kiwei, kaba la pynsynjor ia katei ka jaka bad kumta ha ka janmiet sngi thohdieng, ka la hap lut hi jrain.

Kam dei tang kata, la iohi ba u don sa uwei u lum, uba don ha syndah jong kane ka jaka, kaba twa mynta bad u ban sa hap noh shen, lada jia ba ka wan ka jinghap slap lane lada ym don ba pyntwa noh mardor.
Ka jingiathuh, da ki paidbah, kiba la sahkut lynti, ka long ba ka jingtwa jong ka surok, ka dei namar ba ka NHIDCL, ka kompeni, kaba peit ia ka jingtrei ia ka surok, ka ailad ia ki briew shimet, ba kin tih maw ban khaii sha Bangladesh, na katei ka jaka bad ka jingtih, kam dei satia, kaba tih surok, hynrei, ka dei, ba kin ioh tih maw bad kumta, ka jingtwa, ka dei namar ba la ktah da ki briew ki bym biang ki tiar ki tar bad ki bym shemphang eiei ruh em ia katei ka kam.

Ki paidbah, kiba don ha katei ka jaka, ki iathuh ruh, ba katei ka kompeni, ka la aiti ia katei ka kam khlong maw, ha ki ar, lai ngut ki nongialam sengbhalang. Une u nongthoh, uba la poi, ha katei ka jaka, naduh ka por 10 baje mynstep bad mih haduh ha ka por 12.30 nohsngi, ula pyrshang ban wad ia ki Engineer jong ka NHIDCL, ban iakren halor katei ka jingjia, hynrei, la iathuh, ba kim don satia ha katei ka jaka bad katei ka pyni, ba kim salia satia, wat tang ban jngoh ia ka surok, kaba ki la pynjot, wat haba arngut ki mynsiem briew, ki la duh ei.

Katei ka kam khaii maw, da ki kompeni, kam dei satia ha ka sien nyngkong, hynrei ha ka lyiur ba ladep ruh, kham harum jong katei ka jaka, kaba twa mynta, la iohi, ba ka la don ka jingshah ban jong ki ar, lai tylli ki kali, namar ba ka tuid ka khyndew ha ka por lyiur bad ka daw, ka dei namar ba ki kontraktor lane ki trai jaka, ki sei tang ia u maw ban ioh die sha Bangladesh bad kim shym la pynkhuid thikna satia, kumba dei ban tih surok.

Sngew iahap shi rukom, haba U bah Prestone Tynsong, myntri kam poh iing, ula bthah ia ki bor pyniaid ka Civil Sub Division, ba kin ai ejahar halor katei ka jingjia, hynrei, ka jingkitkhlieh, kam leit tang sha ka NHIDCL bad ka leit lang ruh sha ka tnat PWD, ba ka la ailad than, ia katei ka kompeni jong ka sorkar India ba kan leh trai katba mon, bad na katei ka daw, ba na ka kam tih surok, ka leit poi pynban sha ka kam khaii maw. Haba shu peit, la i dei ruh, ba ki dei ban don ar tylli ki ejahar, kawei na ki trai iing, halor ka jingduh noh ia ki arngut ki mynsiem briew bad sa kawei na ka tnat Civil Sub Division, ban ioh ban tohkit, halor ka jingtrei thurmur ia ka surok.

Ka lyiur, kan sa poi noh shen artad bad kaba ngi duwai Blei, ka long, ba kan lait kano kano ka jingjia kaba sniew sha katei ka thain, hynrei, haba shu peit da ki khmat jong ki riew paidbah, la iohi, ba kin don bun ki lum ki ban hap bad ki surok, ki ban kylla pung um. Kam dei tang kata, kane ka dei ka jaka, kaba jubor bha, ka jingdum lyoh, hynrei kam don satia tang u lain lieh, ban iarap ia ki nongniah kali bad khyndiat taiew mynshwa, une u nongthoh, ula jan jaw ummat, hapoh kali, haba ka jingdum, ka la jubor haduh katta katta, ha kaba ym ithuh shuh ban tyllun shakhmat ia ka kali. Ka jingpynkut ka long, ba ka jingtrei ia katei ka surok, ka long kaba da trei torti palat liam bad katei ka kompeni, ka la pheil, ia ka por jongka, ba ka dei ban pyndep ha U Nohprah 2022. Kam dei tang katta, ia ka jingtrei baroh kawei, ym don uwei ruh u trai shnong, lada dei u Engineer, u kontraktor, ne u nongbylla, kiba donkti ban peit bniah ia ka jingiaid beit jong ka kam bad kumta, ka pisa jong u paidbah lane ka ram na ka kompeni na Japan, la shu bret ei sha riat Rngain.