Aiti ia ki masi ha ki Custom, poi biang sha ki nongkhaii tuh

Shillong,22 Naitung:
Na ka por sha ka por ki shipai ki ju ioh kem ia ki masi ba thmu ban shalan tuh sha Bangladesh lyngba ki khappud bad hadien ba la ioh kem ia kitei ki masi ki BSF ki ju aiti sha ka tnad Custom ban leh ia kaba donkam, hynrei ha ka kyrwoh khubor ba la pyllait paidbah mynta ka sngi ki shipai BSF ki la ong ba hadien ba la aiti ia ki masi sha ki Custom, kitei ki juh ki masi ba la shah kem ki poi biang ha kti ki nongkhaii tuh kiba wan thied ha ka por die lilam ka tnad Custom.Mynta ka sngi ki BSF ki la ioh bat 15 tylli ki masi kiba la thmu ban khaii tuh sha Bangladesh,ia kitei ki masi la ioh bat na ki thaiñ jong ka Muktapur , West Jaintia Hill katba ki briew pat kiba ialam ia kitei ki masi ki la ioh phet krad. Ia kitei ki masi ki shipai BSF ki la aiti sha ka tnad Custom.