Aiti CBI, ym lah pdiang ia ka kaiphod SIT, ong ka CSWO

Shillong, 9 Risaw:
Ka Civil Society Women’s Organization (CSWO) ka la ong ba ka jingpynkut ka Special Investigation Team (SIT), ba u Sub Inspector PJ Marbaniang u la pyniap hi ialade da ka jingshah tynjuh ha ki san ngut; ka dei ka bym lah ban pdiang bad dei ban aiti noh beit ia ka jingtohkit ha ka Central Bureau of Investigation (CBI).
“Ym don uwei ruh uba biej ban ngeit ba kine ki san ngut ki pynbor ia u Bah Marbaniang ban pyniap hi ialade” la ong ka president ka  CSWO ka Kong Agnes Khar shiing haba pyllait kyrwoh ha kane ka sngi Thohdieng.
Ka CSWO ka la  pyllait ia ka kyrwoh, hadien ba u khlieh ka kynhun tohkit ka SIT u SP (city) Bah Vivek Syiem u la pynkut ba ka katkum ka jinglap ka kyn hun tohkit u Bah Mar baniang u la pyniap hi.
Ki pulit ki la kem san ngut kiba pynshit ia u Bah Marbaniang ban pyniap hi ba kynthup ia u  Grandwill Harly Passah (39) u BDO ka Jirang C&RD Block, u Centerwell Daloi u president ka FKJGP-Western Zone, u Lawyer Syngkli (43) u working president ka FKJGP-WZ, u Shemphang Nongtri (32) u dkhot ka FKJGP-WZ bad u Coming Kharbani u kontraktor ka Irrigation department ha Patharkhmah.
“Lada u siat hi na shalangmat balei pat ym don dak siat na kane ka bynta?. Balei khlem leh ia ka  X-Ray  ia ka khlieh jongu kumba la kyrpad da ka kmie jong u Bah Marbaniang?”, la ong ka Kong Agnes.
Ka CSWO ka dawa ba dei ban aiti beit ha ka CBI ia kane ka kam ban iashai namar ba ka dei ka Ka Kong Kharshiing ka la kynnoh ba, “ka seng ka la ioh jingtip ba kiba bun ki heh pulit kiba don par dewiong ha thain  West Khasi hills bad namar kane ka daw ka SIT kan nym leh ia ka jingbishar hok bad kan nym kem ia ki nongpyniap ba kongsan bad ki briew ba hukum ban pyniap ia u PJ Marbaniang”.
Ka Kong Agnes ka la ong balei ki pynduh ia ka sakhi na ka sopti jongu namar ba katkum ki dak ki shin u la shah siat nadien ka khlieh.
Kane ka jingpynkut ka SIT ba dei ka jingpyniap hi, ka pyni ba ki pulit ka jylla kim pat ler ban leh ia ka kam bad ka long ka jingpynjah burom ia ka tnad pulit kaba pyrshang dohiap ban iada ia kiba bamsap.
“Lada ki pulit kim lah ban iada ia la ka iing lajong, kumno kin iada ia ki paidbah bad kane ka la wanrah ia ka jingbym sngew shaniah ia ki paidbah ia ka jingtreikam jong ki pulit”, ka la ong.