Ailad ia ki trai ing ban shong, ap kan rai ka Kashari:UDP

Shillong, 18 Naiwieng:
Ka UDP ka la ong ba ka sorkar ka dei ban ailad ia ki trai iing trai jaka ba shah pynpra ia ki iing ha Umsawlai ba kin sah shwa ha la jaka jongki haduh ban ioh ia ka rai na ka Kashari.
“Ngi kwah ba ka sorkar ka dei ban pynneh kumba ka long ban ailad ia ki trai jaka trai iing ha Umsawli ban shong haduh ban ioh ia ka rai na ka Kashari ban iashai ia ka jinglong trai ia jaka. Ki longing ba shah ktah ki dei ban leit sah biang ha jaka haduh ban ioh ia ka rai na ka Kashari” la ong u general secretary ka UDP Shillong City u Bah Allantry F Dkhar uba dei ruh u Chairman jong ka Fact Finding Committee ba lai ngut jong ka UDP ban peit bad bishar bniah ia ka jingmih ka kynrum kynram halor ka jingiaknieh jaka ha ka thain Umsawli.
U la ong ba ia mynta, la don ka jingiakam ia ka jaka hapdeng ka MUDA bad ki briew ha katei ka thain.
“Ngi kwah ba ka sorkar ka dei ban sangeh ia ka jingpynpra iing ha ki sngi ban wan haduh ba ka kam, la rai da ka Kashari”, u la ong u Bah Dkhar.
Shwa ia kane, ka sorkar jylla ka la rai ban pynneh ia ka jinglong kumba ka long ha ka thain Umsawli.
Ka myntri sor ka Kong Ampareen Lyngdoh ka la ong ba ki longing ba shah pynpra kim dei ban leh ia kino kino ki kam ha katei ka jaka bad ka sorkar ruh kan nym pynpra shuh ia ki iing jongki, haduh ban ioh ia ka rai na ka Kashari.
Katkum ka jingong ka Kong Ampareen, haba ka Kashari ka la kyntait ia ka mukotduma ha u 2010, kitei ki longing ki khlem iakhun shuh bad ki sngap. “Katkum ki kot ki sla ba la ioh na u Deputy commissioner, san tylli ki longing kim shym la don ha ka kyrteng ba la pynmih da u DC ba ki dei ki trai jaka”, ka la ong ka Kong Ampareen.
Ha kajuh ka por, u Bah Dkhar u la ong ba ka Committee ka la ai por haduh ban ioh ia ka jingtip da ka RTI na ka MUDA.
U la ong ba ki kot ki sla ba la ioh na ka MUDA kim pat biang bad na kata ka daw, la pan jingtip da ka RTI ban kham ngam kham jylliew.
Lah ban kdew ba ia ka Committee la bthah ba kan lum ia ki kot ki sla kiba iadei bad katei ka jaka ba iaknieh hapdeng ka sorkar bad ki briew.