Ai sertiphiket u khar Nepali, ujor ka AJYWO sha u DC

Shillong, 2 Naiwieng:
Ka AJYWO hadien ba ka la leit buh ia ka jingujor ha u Chief Executive Member jong ka JHADC halor ka jingkam Rangbah Shnong ba beain jong uwei u Nepali ha ka kyntoit Umthe kaba don ha East Jaintia Hills District mynta ka kynti katei ka seng ka la leit buh ia ka jingujor jong ka halor kajuh katei ka kam beain jong utei u Nepali sa ha u Deputy Commissioner jong ka East Jaintia Hills District, u bah WR Lyng doh. Kat kum ka dorkhast jong ka AJYWO ia kaba la ai ha u DC jong ka EJHD, katei ka seng ka la ujor tyngeh halor ka jingai sertiphiket Permanent Residential Certifi cate(PRC) jong utei hi u juh u Nepali ia ki briew jong u na ka bynta ki jingdonkam ki briew jong u ha ki ba bun ki bynta.
Ym tang katta, ka AJYWO ka la dawa ruh na u DC jong ka EJHD ba um dei ban ai PRC lane Domicile Ceritificate ia ki Nepali jong katei ka kyntoit Umthe kiba applai ia kiba kum kitei ki certificate na ka office jong u (DC) da kaba ki la wanrah syrnod Permanent Residential Certificate na utei u Rangbah Shnong Nepali jong ka kyntoit Umthe. Ha ka jingshisha dei tang ka ophis jong u Deputy Commissioner ka ba don ia ka bor bad ka iktiar ban ishu ia ka Permanent Residential Certificate (PRC) sha ki nongshongshnong jong ka district. Hynrei u tei u Nepali nalor ba u pynkhein ia ka Riti Dustur jong ki Nong Jaintia bad ki kyndon ain jong ka JHADC ha kaba iadei bad ka jingthung Rangbah Shnong, mynta utei u Nepali u la pynkhein ruh sa ia ka ki kyndon ain sorkar da kaba ai syndon da ka PRC sha ki briew jong u.
“Ha ka jingiakren jong ngi bad u DC jong ka EJHD, ngi la dawa na u ban pynshitom ia utei u Nepali kat kum ki kyndon ain halor katei ka kam beain jong u bad ruh ban pynduh pyndam noh shisyndon ia katei ka shnong Umthe ba la synshar da ki Nepali” la ong u Bah M H Dkhar President ka AJYWO Central (G) Body. U tei u nongialam ka AJYWO u la ong shuh shuh bad ka AJYWO ka dawa ruh na u DC jong ka EJHD ban bthah ia ki tnad trei kam ba pher ba pher jong ka sorkar kiba don hapoh u pud u sam jong ka EJHD ban ym ithuh ia kata ka shnong Umthe bad ruh ia uta u Rangbah Shnong Nepali jong ka da lei lei ruh em ha ki jingiadei kam jong katei ka shnong bad ruh ki briew jong ka bad ki kam sorkar baroh. “Ka AJYWO ka kyntu ruh ia ka bor Elaka jong ka Elaka Sutnga ba da lei lei ruh em ba kam dei ban ai bor ia ki Nepali ban seng shnong ialade bad ruh ban long Rangbah Shnong ialade hapoh u pud u sam jong ka Elaka Sutnga kum ba la leh kitei ki Nepali kiba don ha ka kyntoit Umthe mynta namar kane ka jingioh jong ki nongwei ban seng shnong bad kam Rangbah Shnong ialade hapoh u pud u sam jong ka Ri ka Muluk jong ngi kane kan sa buh ia ka jaidbynriew rit paid jong ngi ha ka jingeh kaba khraw hadien ha bud”, ong shuh shuh u Bah M H Dkhar.