Ai sertiphiket ia ki khynnah Burma, shimti U VC thymmai ka MLCU

Shillong, 28 Jylliew:

Ka Martin Luther Christian University ka la ai certificate ia ki 13 ngut ki samla pule na Burma kiba la wan pule ha MLCU naduh u snem 2010. Kine ki khynnah pule ki la ioh sertiphiket, ha ka kyrdan BSW, BBA bad BCA. Ha kajuh ka por ruh u Chancellor ka MLCU u Dr KM Shyamprasad u la pynkhamti kam ia u Bah RG Lyngdoh kum u Vice Chancellor ba thymmai jong kane ka skulbah, bad u Bah Lyngdoh un sa sdang noh shen ha kane ka ophis. Ha kane ka prokram, ba la pyniaid da u Chancellor Dr KM Shyamprasad la iadon lang ki paralok jong ki samla pule ba la pass bad ki nongkyrshan jong ka University. Ka Dr Achan Mungleng kaba la sdang ia kane ka EBO Scholarship Program na ka bynta ki khynnah Burma, ka la ai jingkren ha kane ka jingialang, ryngkat ruh bad U Bah Toki Blah, Kong Patricia Mukhim, U Tbn Torist Mark. Ia u Dr Glen C Kharkongor u VC ba la shong thait, la thung pat ha ka kam kum u Pro Chancellor jong ka MLCU.
U Bah RG Lyngdoh u la kren shaphang ka jingiaid lynti bad ki jingiakynduh jingeh jong kane ka University, bad u la ai ka jinpynshlur bad jingkyrmen na ka bynta ka MLCU ba un ialam ia ka University shakhmat ha kaba iai bteng ban ai ka jinghikai kaba iahap bad kine ki por bad kaba iarap ruh ia ki nongpule ban ioh ia ki jingtbit bad jingpyntbit ki ban myntoi na ka bynta ka lawei jong ki, bad ha kajuh ka por ruh ban ai ia ki khynnah samla ia ki jinghikai akor bad burom ba bha ha ka jingim.