Ai Polytechnic ha Nongstoin, dawa ka WYWO

Shillong, 21 Jymmang:
Ka Western Youth Welfare Organisation (WYWO) ka la dawa ba ka sorkar ka dei ban buh noh ia ka Polytechnic ha Nongstoin. Ia kane ka jingkwah Polytechnic, ka WYWO ka la buh ia ka jingkyrpad ha u MDC shu sieh u Bah Gabriel Wahlang ba un iakren bad ka sorkar.
U Genl Secretary ka WYWO Nongstion Circle u Bah K Lyngdoh ha ka dorkhas u la pynpaw ba ka sorkar ka dei ban shimkhia noh ban wanrah ia ka Polytechnic, ka jaka pule kaba la donkam shisha ia ki khun samla ka thain ha Nongstoin, khnang ban plie lad plie lynti ia ki samla ban ioh pule pyntbit ha ki lain bapher bapher.
Bun ki samla ki hap ban ia beh sha Shillong ban pule ha ki lain bapher bapher bad kane ka la ktah shibun ka jinglut ha ka leit ka wan khamtam kiba wan na ki longiing ki bym da biang ka kamai kajih ki hab ban pep noh ban btang ia ka jingpule jongki.
Ka la pynpaw ruh ba ki surok PWD ha sor Nongstoin ki la sniew shaba palat kaba la ktah ia ki paid nongleit nongwan ban pyndep ia ki kam ha ka por ba biang, kumta ka la dawa ia ka sorkar kan maramot noh mardor ia kitei ki  surok ha sor bad khap sor Nongstoin.
Kumjuh ruh ban pyndep dep noh kloi ia ka surok Nongstoin-Maweit kaba la sah teng la bun bun snem bad ban pyndep kloi ia ka surok bah National Highway Shillong-Tura.