Ai mukotduma ki kontraktor na ka dor dewbilat

Shillong, 13 Nailur:
Ka All Megha laya Contractor & Suplier Association (AMC&SA) ka la ai mukotduma pyr shah ia ka sorkar India bad ka Sorkar Meghalaya, namar ka jingkiew dor khah khah ka dewbilat. Katei ka seng ki nong pyniaid mar bad ki kontraktor ka la ong ba ka daw ka ujor da ka mukot duma ka dei halor ka jingbym shim khia ka sorkar ia ka jing pynkiew dor khah khah ki kompeni dewbilat kiba don ha kane ka jylla, watla ka sorkar ka ai ia ki ka subsidy kaba biang.
Ka kyrwoh ka la pynpaw ba ka daw ba la pynslem ban ujor mukot duma ka dei namar ba ka dang wad jingtip bin pa bin ban ioh ia ki sakhi kiba biang shuwa ban kiew iing lieh ingsaw. Katei ka seng ka la kdew ba ka dewbilat ka dei kaba ym shym la pyndonkam tang ki kontraktor hynrei ka dei ruh kaba ju pyndonkam da ki paidbah ha kiba bunbah ki jingtei shimet bad ki jingtei paidbah.
Ka AMCSA ka la pan ka jingiatreilang na baroh ki kontraktor halor katei ka bynta bad kumjuh ruh ban ia khun ia ka jingeh ba ki kontraktor ha kane ka jylla ki jia kynduh kum ka jing sahkut bill ha ki tnad sorkar, ka jing bym ioh tikna iaka Exemption Certificate na ka Income tax Department ( TDS), ki Khajna bad kiwei kiwei.
Ka AMC&SA ka kyrpad ia baroh ki Contractor ba trei ha ki tnad sorkar bapher bapher ba kin wan shakhmat ban pynsngew ia ki jingeh jong ki ha katei ka lyngba u office secretary u Bah Pyrkhat Lyndem bad bah M.A.kharpuri ha ophis treikam jong ka seng ha Barik PWD da ka jingthoh lane ha ka email ID jong ka seng [email protected] , khnang ban ioh ban shakri kham bha ia ki para kontraktor kiba ia kynduh ia ki jingeh bad ban kham pynjanai iaka rukom treikam ka seng. Ka la kyrpad ruh ia ki kontraktor ban wan shakhmat ban pyniasnoh lane rejistar ialade bad katei ka seng ban iakhun ryngkat ia kiba bun ki jingeh ba ki ia kynduh.