Shillong:Hadien ba ka Iing bishar ba ha khliehduh jong ka Ri India kata ka Supreme Court of India, ka la ai rai ban shah biang ban tih dewiong ha jylla Meghalaya ha ka 3tarik Naitung, 2019, ka sorkar India dang shen ka la ai Licence sha ki katto katne ngut ki nongshong shnong ka Meghalaya ban kin tih dewiong hapoh West bad Southwest Khasi Hills District. Ka sorkar kmie ka la shah ban tih dewiong katkum ka jingstad saian bad ruh ka juk ba mynta bad ym kum ba shait tih thliew khnai mynshwa.
Ha ka rai khadduh ba ai ka Supreme Court of India ha ka 3tarik Naitung, 2019, ka Iing bishar ba don burom ka la kyntait lut ia ki jingkyrpad ba wanrah da ka District Council Garo Hills bad District Council Khasi Hills ban ai lad lem ia ki ba kin don bynta ha ki kam ai licence na ka bynta ka tih dewiong. Ka iing bishar Supreme Court ka khlem ai lad ia ki District Council ba kin don bynta wat ha ka die lilam ia u dewiong lyngba ka Coal India Ltd ruh. Ka ain tih dewiong ka kren shai ba ym don hangno hangno ruh ba kan ong ba hap ioh jingbit shwa na ka District Council la ne ba lah ban tih dewiong lyngba ka District Council.
Ka Jaintia Hills District Council ha u snem 2020 ka la pyrshang biang ban file case pyrshah ia ka hukum, ka Supreme Court ba ka khlem ai lad ia ka District Council ban tuklar ha ki kam tih dewiong ha Jaintia Hills, bad ruh ka la kyrpad ia ka Iing Bishar ba ha khlieh duh ban sngap lem ia ki jingkyrpad jongka ha ka ban ai lad ia ka JHADC ban ia don bynta lem ha ka ba ai permission ban tih dewiong sha ki riew shimet la ne ki nongshong shnong ka Ri jaintia. Hynrei wat ha jrong ka jingiasaid bad jingkyrpad jong u nongiasaid ain ka Jaintia Hills District Council, ka Iing Bishar ba don burom ka Supreme Court of India ka la ong ba ka jing ia sait jong ka JHADC ka dei ka bym don nongrim satia ei ei ruh bad ka la kyntait bad dismissed ia ka case jong ka JHADC ha ka 12tarik Kyllalyngkot, 2021.
Ha dien ba shah kyntait bad shah rem case ha ka 12tarik Kyllalyngkot, 2021, ka JHADC ka la pyrshang biang ban wad lad wad lynti ban kyrpad biang ia ka Iingbishar ba don burom ka Supreme Court of India da ka ba file Curative Petition 109 of 2021, ha ka 13tarik Rymphang, 2021 bad tad haduh mynta ka Iing bishar ba ha khlieh duh ka khlem pat ailad la ne sngap satia ia ka JHADC .
Ka Curative Petition ka dei ka mukotduma ba file hadien ba shah rem la ne bym sngap ka iing bishar ia ki jingiasaid ha ka por ba pass ia ka jing bishar lane ka rai ba khadduh da ka Iing bishar. Nyngkong ka JHADC ka la dep file file shwa da ka Review Petition ha ka ba ka Iing bishar ba ha khlieh duh ka la kyntait bad dismissed ia ka Review Petition. Hadien ba shah kyntait ka Review Petition ka JHADC ka file biang sad a ka Curative Petition halor ha juh ka case. Kat kum ba shait long ia ki Curative Petition ym ju kham don jingiasait hapoh ka Court Room hynrei tang hapoh kamra ki Nongbishar, bad tang teng teng eh ka Iing bishar ka shait ai lad ia kum kine ki petition ban iasaid hapoh Court room lane ha poh kamra iasaid nia ka Iing bishar.
Phi don ban ong eiei?