Ai ksai U Mukul ban shimti ka sorkar ia baroh ki kam hikai

Shillong, 5 Lber:
U Myntri Rangbah ka jylla u Dr Mukul Sangma u la ai ksai ba ka sorkar kan pyntreikam da ka rukom kaba ryntih ia baroh ki kam hikai ha ki skul.
Ia kane u Myntri Rangbah u la pynsngew hakhmat ki nongialam ka JACATAM ha ka jing iakynduh kaba la long mynta ka janmiet.
Katkum ka jingia thuh u Publicity Secretary ka JACATAM u Babu Kular Khongjirem, u Myntri Rangbah u la kane ka jingong jong u Myntri Rangbah ka long ban iaid shakhmat na ka bynta ban shimti ia baroh ki kam hikai jong ki skul ha kane ka jylla kumba la dawa da ka JACATAM.
“Ka sorkar kan bishar bniah ia kane ka kam bad kan leh ia kaba donkam kloi katba lah”, la iathuh u Babu Khongjirem katkum ka jingkular jong u Myntri Rangbah.
Ha kajuh ka por, u Myntri Rangbah u la kular ba un khot biang ia ka jingialang bad ki nongialam ka JACATAM hadien ba kut ka dorbar mang tyngka ban iakren kham bniah ia kane ka kam shwa ban iaid sha kaba kut.
Kham mynshwa na ka liang u Director ka DSEL u la dep phah ia ka jinglap ne ka kaiphod na ka jingwan jurip na kiwei ki jylla halor kumno ban shimti noh ka sorkar ia baroh ki kam hikai ne provincialisation ha kane ka jylla.