Ai ksai U Bah Pynshngain, ban kiew iinglieh iing saw

Shillong, 27 Nailur:
U Chief Executive Member (CEM) ka KHADC u Bah Pyn shngaiñ N Syiem u la ai ksai ba un leit kiew noh sha ka iing lieh iing saw ban ujor pyrshah ia ka ain khang bam maloi kaba pdiang da ka iing dorbar ka Meghalaya ka Prevention of Disqualification (Members of the Legislative Assembly of Meghalaya) Amendment Bill, 2015.
‘Nga la iakren bad ki stad ain ban eksamin ia ki lad ki lynti kumno ban kiew iing lieh iingsaw pyrshah ia ka jingpdiang ia ka Bill. Ngin eksamin shuh shuh ia kane shwa ban iaid shakhmat ban ujor ne em sha ka Kashari,” la ong u Bah Syiem uba dei MLA /MDC na Mawsynram constituency.
U la ong ba u sngewthuh ba ka sorkar ka la pynbna ba ka jing pynkylla ia ka Bill kan treikam noh naduh ka 1 tarik Risaw.
“Hynrei katkum ka jingsngewthuh jong nga, ka bill kam lah ban treikam khlem ka jing mynjur u Lat ka jylla. U Lat u lah ban pan jingkylli na ka sorkar halor kane ka Bill kaba ktah ia ki MLA/MDC” la ong u CEM ka KHADC.
Ha kajuh ka por, u Bah Syiem u la ong ba u la iakren bad ki nongialam la un iehnoh kum u MLA ne MDC.
“Ngan pynthikna hapoh kine ki khyndiat sngi ban wan”, u la ong.
Kumjuh u MLA/MDC ka Mairang u Bah Metbah Lyngdoh u la ong ba um pat shim ia ka rai namar ba u dang kwah ban iakynduh ia ki nongkyrshan jongu.
“Nga la khot ia ka jingialang bad ki nongialam bad ki nongkyrshan ka constituency la sngi Nyngkong. Nga donkam ban kynduh ia ki shwa ban shim ia ka rai” u la ong u Bah Metbah.
U la ong ba u la iakren ruh bad ki stad ain, la ki don ne em ki kyndon kiba lah ban ujor sha ka kashari halor kane ka kam.
“Hynrei ka don ka jingeh namar ba ngi don tang khyndiat ka por ban pyrkhat namar ba ka sorkar ka la rai ban pyntreikam ia kane ka ain naduh ka 1 tarik Risaw ban wan”, la ong u bah Metbah.
Ar ngut ki MDC u Bah HDR Lyngdoh na Sohiong bad Bah Ardent Miller Basaiawmoit na Nongkrem ki la dep iehnoh kum u MDC katba u Bah KP Pangniang na Rambrai-Jyrngam u la pynbna ba un iehnoh kum u MDC hadien ba la iakynduh bad ki nongkyrshan ha kane ka sngi Thohdieng.
Katba u MLA/MDC ka NCP na Laban Bah Sanbor Shullai, u MLA/MDC ka UDP na Mawthadraishan Bah H Brolding Nongsiej bad u MLA/MDC na Amlarem Bah Stephan Mukhim ki dang ngap jar halor kane.