Ai khublei ka KSU ia U DC South West

Shillong,9 Jylliew:
Ka Khasi Students’ Union, South West Khasi Hill District unit ka dap da ka jing sngew kmen kaba khraw ban ioh jing tip bad ban iohi ha ki lad pathai khubor ba ka bor pyniaid District jong ka South West Khasi Hill District hapoh ka jing ialam U Deputy Commissioner Bah Aldous Mawlong (IAS) Ka la shim khia ban pyntreikam tikna, janai bad pura ia ki kyndon ain ka Inter-State Migrant Workmen (Regulation of Employment and Conditions of Service) Act, 1979 da kaba wan rah ia Work permit ia ki nong bylla bar jylla hapoh ka jylla Meghalaya.
Ka seng ka la pynpaw ba kane ka jingshim khia jong u DC halor ka Work Permit ka long kum ka jing tehlakam bad pyniaid beit (control and Regulate) ia ka jing wan rung kyrthep ki poiwir beain hapoh ka District bad ka jylla hi baroh kawei. Ka kyrwoh na ka seng ka la pynkut ba kane ka jingleh ong u DC kan long kum ka nuksa ia kiwei pat ki District ha ka jylla . Ka seng ka la kit bok kit rwiang ruh ia u Bah Mawlong ba un nangkiew shaphrang ha ka jingtrei jong u.