Ai khublei ka CoRP ia u Rayonald Kharkamni, ba shah jied ha ka BCCI kum u Match Observer ha ka Test ka India pyrshah ia ka New Zealand

Nongpoh, 24 Risaw: Ha ka kyrwoh kaba la phah da u Bah Bandari Ryntathiang, President rangbah ka Confederation of Ri Bhoi People (CoRP), la pynpaw ba ka seng ka ai jingiaroh ia u Bah Rayonald Kharkamni, President Ri Bhoi District Cricket Association (RBDCA) bad uba long ruh kum u Vice-President ka Meghalaya Cricket Association (MCA), uba la shah jied ha ka Board of Control for Cricket in India (BCCI) ba un long kum u Match Observer ha ka jingialehkai Test hapdeng ka India pyrshah ia ka New Zealand, ka ban long ba Wankhede Cricket Stadium ha Mumbai, ka ban sdang ha ka 1 tarik haduh 5 tarik u bnai ban wan.
U Bah Bandari Ryntathiang, u la ong ba ka seng ka sngewsarong ban iohi ba ki samla rangbah na ka dong ka thain, ba kin kynjoh sha katei ka thong, ha kaba ki la shah peit khmat kat ha ka BCCI, ba kin long kum kita ki Match Observer ha katei ka jingialehkai Test.
Shuh shuh, ha ka kyrwoh la pynpaw ruh ba ka CoRP, ka ai khublei kaba kyrpang bad iaroh ruh ia ka jingtrei shitom u Bah Rayonald Kharkamni, na bynta ban kyntiew ia ka kam lehkai Kriket, la la long ha Ri Bhoi bad ha ka jylla hi baroh kawei.
Khyndiat kum ban shu kdew, ba kiba la shah jied ha ka BCCI ba kin long kum kita ki Match Observer, ka long ba ki dei ban phah ia baroh ki kaiphod, kiba iadei naduh halor ka jinglong jingmang ki madan ialehkai, ki nongpyniaid ia ka jingialehkai (Umpire), ki kam kiba iadei bad ki rang ialehkai lem bad kiwei kiwei ki jingdonkam hapoh ka jingialehkai.