|
Ka CoHSO, nyngkong nyngshap eh, ka ai khublei ia baroh ki parari ka Jaidbynriew Hynniewtrep; naduh ki Nongialam Sengbhalang, ki Dorbar Shnong, Dorbar Hima, ki Dorbar Kur, ki Seng Nongniah Taxi, Seng Nongshong iew, Seng Samla Shnong, Seng Kynthei, Seng Nongrep, Seng Nongbylla , Seng Sainpyrthei, ki Nongthoh bad Nongpynmih khubor, ki Riewshemphang bad ia baroh kyllumlang ki dkhot ka Bri u Hynniewtrep kiba la ia kyrshan tylli bad don ryngkat badngi ha ka Dorbar Bah ki Khun ka Bri u Hynniewtrep ha Madan Student, Jaiaw ha ka 31 Tarik u Kyllalyngkot, 2019.
Ka la long ka Dorbar kaba jop bad kaba ai jingkyrmen haduh katta katta. Ngi pynpaw ia ka jingkhublei kaba naduh tyllong mynsiem ia baroh lang; la ka long ki nongkren, na ka bynta ki symboh jingpyrkhat jong phi, bad khamtam eh, ki paidbah nongsngap ki bym shym la khih na la ki jaka shong ha katei ka sngi; namar ka jingsngewkhia na ka bynta ka jait ka khong lajong ka kham khraw ban ia ka thait ka jrem jong ka met bad ka mynsiem. ParaRi, ngi dei ban tip ba ka jingiakhun bad ka jingialeh kan dang iai bteng nangne shakhmat. Kumba la bynshet da maphi u paid ka bri u Hynniewtrep, ngin iai khih, ngin iai ksaid bad ngin iai ialeh. Ka por ka dawa ba ngin iatylli mlon ban pyrshah ia ka CAB bad ban dawa pyntreikam noh mardor ia ka ILP. Ka CoHSO kan duriap minot thop ban long bad iai long ka sur ba jam ka jong phi. Ka kynhun, shen shen kan sa shong jingialang ha kine ki sngi ban wan, ban shim ia ki rai ban bteng biang ia ka rukom iakhih pyrshah ia ka CAB bad ban dawa ILP, kumba ka sur ka la sawa ha Madan Student myn 31 Tarik. Ka CoHSO ka sngewburom shikatdei eh ia baroh ki jingaijingmut jong ki riewrangbah khamtam ia ka jing kren u CEM ka Khadc ba ki Sengbhalang ki dei ban pynieng kyrtong MP mynta ka kynti. Hynrei kumba phi tip, ka CoHSO ka dei ka thup ki Sengbhalang bad kan iai long kumta borabor, ha baroh ki por. Ngim don bad ngin ym ia don bynta ha kano kano ka kam sainpyrthei. Ki election kin leit bad kin wan, ki riewsainpyrthei bad sengsainpyrthei kin mih , kin iai mih bad kin jah ruh. Ka CoHSO, hynrei, ka ieng skhem ban iai long ka sur jong ka Jaidbynriew Hynniewtrep, ka ban iakhun dohiap tat haduh ba ki thong kin urlong, tat haduh ba u Trai Ri un skhem ka im ka iaid, ka khaii ka pateng, ka nguh ka mane, ka synshar ka bishar hala Ri, hala kyrpong . Shuwa ban pynkut ia kane ka kyrwoh, ngi sngewbha ban pynkynmaw ia baroh ki Sengbhalang ha ka bri Uu Hynniewtrep ba ka ia ka dawa ba ngin iatylli lang kawei, ha ka jingmut, ha ka sur bad ha ka thong. Ka mynnor ka la leit bad ngim lah pynbeit shuh iaka. Kaba kham donkam ka long ba ngin iatylli na ka bynta ka lawei ka Ri bad ai ba ka mynsiem ieidri jongngi kan tehsong lang mlon iangi baroh. Ngi kyrpad, namarkata, ia baroh ki Dorbar Trai Ri naduh ki Dorbar Hima ne Dorbar Ilaka, Dorbar Raid, Dorbarshnong bad Dorbar kur ba phin iasnoh kti lang mynta ka kynti ia ka jingiakhih pyrshah CAB bad ha baroh ki por. Ngi kyrpad ia baroh ki Seng Sainpyrthei bad ki Nongmihkhmat paidbah ba phin ia pyrshah dohiap ia ka CAB bad phin dawa borbah ban pyntreikam noh ia ka ILP hangne hangi. Ngi kyntu bad kyrpad ia phi baroh ki paidbah ka Bri u Hynniewtrep ba phin iai dwai bad iai kyrshan iangi ha ka met bad ka mynsiem ha ki por baroh. U Blei Trai Kynrad un iai kyrkhu iaphi ba phin biang u khaw u kba bad phin koit phin khiah krat borabor. Khublei shibun. Uba Burom iaphi. Sd / Robert June khar jahrin President HYC Chairman CoHSO |