Ai jingmut U Pastor Snaitang ia u Bah John ban leit sha UNO

Shillong, 23 Nailar:
U Pastor OL Snai tang u la ong ba ka jing iakhih jong u Bah John F Kharshiing ban pynrung ia ka Instrument of Accession (IOA) ha ka Riti Synshar ka ri India kan shem jingeh bha namar ba ka New Delhi kan nym pdiang satia.
Haba kren ha ka jingiathir halor ka Lym pung Sain Pyrkat halor ka Instrument of Accession, ka Sixth Scheduled bad ka Jaitbynriew Khasi”, ba la pynlong da ka Khasi Publishers Allied Society (KPAS) ha kane ka sngi Saitjain, u Pastor Snai tang u ba kren halor ka phang, ‘ka history ka 6th Scheduled bad ka jaitbynriew’, u la ong kan long kaba kham biang lada u Bah John F Kharshiing un leit rah noh ia ka IOA sha ka sorkar ka pyrthei ne ka United Nation Organisation (UNO) khnang ban leh ia kaba donkam.
Ha ka jingsngew jong nga, ia ka IOA dei ban leit rah noh sha ka UNO”, la ong u Pastor Snaitang bad bynrap, “Lada dang leit nguh leit dem ha ka Delhi, jop hi kaDelhi, kan leh kumne kumtai”. U Pastor Snaitang u la sangeh tyngeh ruh ia ka jingiapait iapra ka jaitbynriew Khasi kaba la jia naduh mynshwa haduh mynta. “Kaba sngew tam ia ka jaitbynriew jong ngi, ka long ba Ngi Iapait iapra ban iatylli bad ngi iatylli ban iapait iapra”, la ong u Pastor Snaitang da kaba kdew ia ka jingjia dang shen ha KHADC ha kaba la mih ka kynrum kynram sain pyrthei bym sngewthuh bym sngewthaw shuh namar ka jingiapait iapra. Ka jaitbynriew jong ngi ka iaid kumne shi kumne naduh mynshwa haduh mynta, la bynniaw u Pastor. Katba u Bah John F Kharshiing uwei na ki nongkren ha kane ka jingiathir, u la ong ba ka IOA haduh mynta ka dang im bad ka dang don ka lynti ban iakhih ban dawa pynrung ha ka Riti synshar ka ri.
U Bah Kharshiing u la sei ia ki kot ki sla ban pynshong nongrim ia ka jingim ka IOA  ban iada ia ka ri bad ka jaitbynriew na ka jingwan thombor ka sorkar India.  Katkum ka jingong u Bah Kharshiing ki MLA ka Meghalaya ki dei ban iakren ia ka IOA hapoh ka  iing dorbar thawain ban shim ruh da ka rai ban phah sha ka sorkar India ba kan pynim ia ka.
Hynrei nga sngew lyngngoh, balei ki MLA jong ngi ki lehrain ban iakren ia ka IOA hapoh iing dobar”, la ong u Bah Kharsiing.
U la ong ba jin lada ym don ka jingialeh phulia ban pynhap jubor ia ki Hima Khasi ha ka Assam Province ha kito ki por, ka IOA ka la ieng naduh mynshwa ban ioh ia ka jinglaitluid ka ri India bad ka ri Khasi ka la dei ban ioh ia la jylla lajong naduh katei ka por.
“Namar ka jingleh buit tuh jong ki katto katne ki briew kiba dei ki dkhot ka constituent assembly, ka IOA ka la duh rung ha ka Riti Synshar ka ri India bad la bsuh ia tang ha ka jingthoh”, la ong u Bah John.
U la ong ba katkum Riti synshar ka ri, baroh ki Hima Syiem ha ri thor ki la jah lut namar ba ki iasoh ia ka Instrument of Merger (IOM) katba ki Hima Khasi kim shym la ioh ia ka IOM bad ki iasoi tang ia ka IOA. Ka Kong Patricia Mukhim pat kaba kren halor ka Ki bynta ka jingpynkylla ia ka 6th Scheduled ban pynkhlain ia ka jaitbynriew, ka la takrain ia ka district council ka bym lah ban trei ia ka kam kumba la bynshet ha ka.Ka la ong ba katba nangbun ki rukom synshar, katta nang mih ki jingkulmar bad ka la wohnia ia ka jingong ban ai bor ban ithuh ia ki Syiem ki Kmie namar ba kine ki dei kiba la don lypa ka bor hynrei kim leh eiei bad ha jaka ban dawa pynkup bor ia ki, dei ban dawa ban pynkup bor shuh shuh ia ki paidbah namar ba kane ka dei ka ri synshar paidbah.
“Ka district council ka treikam thurmur bha, kam don ka jingpynbiang ia ki jingkhein jingdiah, ka jingtreikam kaba shai”, la ong ka Kong Mukhim bad bynrap, ba wat ia ki bor ba ka la don kam shym la lah ban pyntreikam satia kum ka um ka wah, ki jaka ban pynneh pynsah bad kiwei. “La iathuh ia nga da ki stad na NEHU ba ki nongmihkhmat na District Council ki ju leit ban pan jingmut kumno ban pynkhlain ia ka district council hynrei haba ki heh na NEHU ki ong ba kaba kongsan ka long ban pynbiang ia ki jingkhein jingdiah, ka jingtreikam kaba shai, ki nongialam na district council ki la shu jah jlep noh khlem wan mih shuh”, la ong ka Kong Mukhim bad bynrap ba kane ka pyni ba ka district council kam shym la treikam ha ka rukom kaba shai.Ka la ong ba donkam ia ka district council ba kan treikam ha ka rukom kaba shai ha kaba ki paidbah kin ioh ia ka bor, ym ban shu treikam khlem kano kano ka jingling kaba shai.
Nalor kine ki nongkren, la iashim bynta bun ki riew shemphang kiba la pynpaw ia ka jinglap bad ka jingshem jongki halor kane ka IOA, ka 6th Scheduled ha ka jingiadei bad ka jaitbynriew Khasi.