Ai jingmut ka HSPDP ban weng ia ka ktien “President” na ka Sixth Schedule para 12 A

Shillong: Ka seng sain pyrthei ka Hill State People’s Democratic Party (HSPDP) lyngba ka shithi sha u Myntri kam pohing ka sorkar kmie u Amit Shah ka lah dawa ban pynkylla noh ia ‘Sixth Scheduled Para 12A’ na ka constitution jong ka ri India.

Ha ka jing ialang ka ba long ha ka 11 tarik Naiwieng 2019 ka seng ka lah ia mynjur ba dei ban pynkylla noh ia ka ‘Sixth Scheduled Para 12A’. Ka seng ka lah dawa ba dei ban weng noh ia ka kyntien ‘President’ bad buh bujli noh da ka kyntien ‘Governor’ na ka ‘Sixth Scheduled Para 12A’ jong ka constitution ka ri India.

Ka seng ka lah kdew ruh ba haduh mynta ka jylla Assam ka dang pyndonkam ia ka ‘Paragraph 12 (b) the Governor of Assam’ ba ong ba u ‘Governor’ u don ka bor ban khanglad ia ki ain ka ‘sorkar kmie’ ban long ain ha Assam.
Ka HSPDP ka ngeit ba lada lah ban weng noh ia ka kyntien ‘President’ na ka ‘Sixth Scheduled’ kan iarap shibun ia ki ain ka jylla ban iada ia ka kyndew ka shyiap jong ki paitbah. Ka jing pynkylla na ‘President’ sha u ‘Governor’ kan khanglad ia bun ki ain ba thaw na ka ing thawain ka ri India ban ktah ia ka jylla Meghalaya namar ba ka jylla ka hap ha ka ‘Sixth Scheduled’.