Ai jingiarap ka KSU ia ka skul, ba la shah pynjulor ha ka eriong ha Umsohbar

Nongpoh:Ki nongialam ka KSU Warmawsaw Unit, ki la leit ban iarap da kaba ai sngewbha da ki tin sha kawei ka skul kaba la tip kum ka Church of Christ SSA LP School kaba don ha shnong Umsohbar.

Ka jingleit ai jingiarap da kitei ki nongialam ka KSU ia katei ka skul, ka dei hadien ba ki nonghikai jong katei ka skul, ki la wan pan jingiarap sha ka seng, da kaba pynpaw ba ka skul jong ki, ka la shah pynjulor eh ha ka eriong bad u Phria, kaba la jia ha u bnai Iaiong.

Lyngba ka jingiarap da ki nongialam ka KSU Warmawsaw Unit, na ka liang ki nonghikai jong katei ka skul, ki la pynpaw ia ka jingsngewnguh kaba khraw eh ia ki KSU, namar ia kitei ki tin kaba la ai sngewbha da ka KSU, kin sa ioh ban tap bad sop bha ia katei ka skul bad ba ki khynnah kin lait na kaba jaw slap ha ki por ba hap slap.