Shillong:Ka kynhun WE HOPE FOUNDATION hapoh ka jingialam u Samla Lucky Star Lamin (President) bah Consolarlang Swett (Secretary), bah Pyndapborlang Kharpuri (Publicity Secretary) bad u bah Beverly Suchen (Programme Manager), ha ka 05tarik Nohprah 2018 ki la leit ai jingiarap ia kawei ka longïing baduk, kaba don ar ngut ki briew kiba don ka jingduna ha ki dkhot met ha ka bor pyrkhat kaba la tip kyrteng ka Speindaris bad ka Spailin Jyrwa kiba dei na ka shnong Diengsyiang, West Khasi Hills District.
Kane ka song jingiarap kynthup ia ka tin sop ïing, Goodrej, borti, khiew um, ki tiar shet, artylli ki Kombol kup thiah bad la aiti sha kine arngut ki shi para ryngkat ka jingiadonlang, ki kmie ki kpa, ka shnong, ka Balang bad ki nongialam ka Khasi Disabilities Association. Nalor kine ka WE HOPE FOUNDATION ka la ai jingiarap ruh da ka pisa ia ki hynriew ngut ki briew kiba don ka jingduna ha ki dkhot met kiba donlang, na katei ka juh ka shnong.
U bah Lucky Star Lamin ha ka jingkren u la ong kine ki jingiarap kidei kiba ngi ia synñiang para dkhot ban ai jingiarap man ka por ia ki parabriew kiba wan na ka longïing baduk. Haba ngi ieit ngi ai bad haba ngi ai kamut ngi ieit, u la ong ka jingieit jong ngi ia U Blei ha kaba rieh, kadei ban paw lyngba ka jingieit bad ki jingiarap jong ngi ia ki parabriew ha kaba paw bad ngi don ia ka thong “Ki khunswet, ki longïing baduk bad ki briew kiba don ka jingduna ha ki dkhot met ki long ka lyngkha trei jong ka We Hope Foundation bad dei lyngba ka jingiatreilang bad ka Khasi Disabilities Association (KDA) ba ngi jied ban ai jingiarap ia kane ka longïing baduk ha ka shnong Diengsyiang.
U bah Consolarlang Swett u la ong katno ka mynsiem jong nga ka kmen ba nga la ioh ban iarap lem ia kiba duk bad hato kan ai jingkmen aiu ia ngi ha ka pyrthei wat lada ngi don iaka spah ka phew, ki ïing paki dulan hynrei ngim don pat ia ka jingieit, ka jingsngewsynei ia ki parabriew ki ban iakmen lang bad kiei kiba ngi don bad nga sngewthuh halade katba nga dang lah ban leh isynei ia kiwei, katta nangioh bun ka jingsuk, ka jingkmen ha ka mynsiem.
U bah Starwin Kharjana President Khasi Disabilities Association ha ka jingkren u la iaroh ia ka We Hope Foundation kaba la iarap ia ki briew kiba don ka jingduna ha ki dkhot met bad u la ong ba kane ka nuksa kan long ia kiwei pat ki seng treimon sngewbha, namar ki briew kiba don ka jingduna ha ka bor pyrkhat ki kham kmen ia ki jingiarap kaba ki iohi bad to tip ka babha kam don da kawei pat ka lynti ban hikai, lait tang da kaba babha hi.
La pyniaid ia ka jingialang da U bah W. Wanñiang Secretary Shnong Diengsyiang bad ha ka juh ka por udei u Tymmen basan jong ka Balang Presbyterian, u la ai ka jingiaroh shi katdei eh ia ki matti isynei jong ka WE HOPE FOUNDATION bad u la ong ha ka jingim jong u ka dei ka sien kaba nyngkong ban iohi katne ki lad jingiarap tang ia kawei ka longïing baduk ba kin wan ai hi shaduh nongkyndong bad kiwei ki nongkren kynthup ia u bah Michael Thongni General Secretary jong ka seng KDA.