Ai jinghikai ia ki samla

Shillong,10 Iaiong:
Ka Parumkhen Youth Welfare Organisation (PYWO) ka la pyn long ia ka “Training on Youth Development” ha ka 5 tarik mynta u bnai ha Nongkharai Community Hall naduh ka por 10 baje mynstep haduh ka por 4 baje janmiet. Ia kane ka Training la sponsored lane la kyr shan da ka District Planning Office, West Jain tia Hills lyngba ka V.A.F 2012-13. La pyniaid ia ka Training da U President bah K. Kharsah noh.
Nyngkong, la ioh ka jingkren pdiang na U Rangbah Shnong ka Nongkharai U Bah A. Ryngkhlem u ba la pdiang sngewbha ia kane ka Training kaba long ka jingmyntoi ia ka imlang sahlang. U Rangbah Shnong u la kyntu ia ki nongshong shnong ban ia trei lang ha kano kano ka por ba don ka prokram namar kiba kum kine ki Training ki ju ai ka jinghikai bapher bapher.
La ioh ka jingkren na U Resource Person U Bah I. Muksor u ba long ha ka juh ka por kum U Sanitary Inspector na ka Nartiang PHC. U Bah Muskor, u la ong ba ka koit ka khiah ka long ka spah bah kaba khraw. U la ong ba kam myntoi ia u briew ban don kyrhai ka spah lane ban don spah da ki phew klur lada um don ia ka koit ka khiah kaba pura. Nangta u la ong ba ki samla ki hap ban husiar bha ia ka koit ka khiah jongki khnang ba kin ioh ia kata ka Youth Development. Ka jingroi jingpar jong ki samla ka shong ha ka koit ka khiah jong ki. La ioh ruh ka jingkren na U Main Resource Person Mr. E.G. War,
Organising Secretary MUPSTA State Level u ba la ai ka jingkren kaba bniah ha ka jingiadei bad ka Youth Development. U bah War u la ong ba kine ki long kita ki sngi ki ba eh bha ia ki samla, kadei ka por ka jingkyrduh kam kyrduh jam. U la ong da ki phew hajar ki samla ki shah pynkup degree man la ka snem katba tang da ki phew ngut ki la lah ban ioh rungkam ne trei kam sorkar ha ka shisien shisnem. Ym juh kham iohi koit ba ka sorkar ka khot pynbna laitkam namar wat kiba la ioh rungkam ruh la shu thung na kyrpong iing. Ka dei ka challenge ia ki samla. Namar kata, U Bah War u la ong ba ka por kala dei ia ki samla ban ieng hala ki jong ki kjat ban kyrshan dalade ia lade. Ki samla kiba la nang stad kim dei than ban shu khmih lynti bad ap dngong ban ioh kam sorkar.
U Bah War u la ong ba ka sorkar ka la pyrshang ban iarap ia ki samla ban seng kam seng jam da kaba ai sub-sidy lyngba ki Bank bapher bapher. U la ong ba don bun ki kam ba dang lait lada ki samla kin trei shitom shisha. U Bah War u la ai nuksa kum ka jingthain jain, suhjain, shna mula, thain khoh, thain star, thain shang, suh juti, ri sniang, ri syiar, ri masi dud, thung sying, thung synsar, plie dukan sha dukan ja, dukan marbam, dukan electric, dukan kot, suh kot bad kumta ter ter. Kine baroh ki long ka kam kaba dang dawa ia ki samla ban phai khmat noh bad ban sdang noh ia ka mynta hi, ban seng ia kitei ki kam. Ki samla ki dei ban ia kynduh ruh ia ki Department bapher bapher kum ka Industries, Fishery, Block Development, Veterinary, Agriculture, Horticulture bad kiwei kiwei de khnang ba kin ioh ka jingpynshai ba kham bniah.