Nongpoh:Ka Seng Samla Shnong Mawlasnai hapoh ka jingialam u Samla Shemphang Masharing kum u President, mynta ka sngi ka la pynlong ia ka Program lyngkot ha Plielad Secondary School, Mawlasnai, kaba long ruh kum ka jingsdang noh ia ka Free Coaching Class kaba Ar Bnai kynthih, na bynta kito ki khynnah kiba hap ban pynkhreh ia ka SSLC Examination 2021.
Halor katei ka Free Coaching Class, u Samla Shemphang Masharing, u la ong ba ki la iohi ia ki jingeh kaba la iakynduh da ki khynnah skul, khamtam eh kine ki bnai ba la dep ba bun na ki skul, colleges bad ki univSersities bapher bapher kim ioh lad shuh ban pynlong class naka daw ka jingkhanglad ka khlam COVID-19, ha kaba bun ki khynnah nongkyndong kim iohlad wat tang ban leh ia ka Online Class namar ka jingbym biang Network, kumta na bynta ban iarap ia kiba kum kitei ki samla, ka la pynlong ia ki Seng Samla Shnong Mawlasnai, ba kin shim ia katei ka sienjam, khnang ba kan iarap ia kito ki khynnah kiba pynkhreh ia ka Matric kaba mynta u snem.
U la ong ruh ba ka jingthmu jong katei ka Free Coaching Class, ka long ban kyntiew ia ka jingnang jingstad ki samla ha katei ka thain, namar ha katei ka Free Coaching Class kaba ar bnai, ki khynnah kim donkam ban siew pisa.
Ha katei ka sngi, la ioh ruh ia ka jingkren na u Bah Joplin Sten, Rangbah shnong Mawlasnai, ha kaba u la ai ka jingiaroh kaba khraw ia ki nongialam ka Seng Samla Shnong Mawlasnai, kiba la shim ia katei ka sienjam bad ka ban long shisha ka jingmyntoi, na bynta kito ki khynnah ki ban iakhun ia ka Matric.
La ioh ruh ka jingkren na u Babu Khonglah kum u nonghikai, u ban ai ia ka jinghikai ia ki samla pule, uba la ai ka jingkular ba un trei shitom na ka bynta ban ai ka jinghikai kaba paka ia kitei ki khynnah kiba leit sha katei ka Coaching Class.
Kiba la donlang ha katei ka sngi ba la sdang ia katei ka Free Coaching Class, ki kynthup naduh u Bah Fidalis Lynshiang, Secretary Shnong Mawlasnai , ki Executive Shnong Mawlasnai lem bad kiwei.
Phi don ban ong eiei?