Ai jaka, lada pynpra ia ka jingkieng Motphran Dawa ki nongdie jain jingkieng Motphran

Shillong, 1 Nailur:
Ka Synjuk Ki Nong die Jain Jingkieng Mot phran (SKNJJM) mynta ka sngi, ryngkat ka jingia synran lang ki dkhot ka KSU bad ka FKJGP ki la leit ban tur sha ophis jong u Deputy Commissioner ka East Khasi Hills ban ia kynduh ia u DC, hadien ba la pynmih ia ka hukum ba ki dei ban mih noh na katei ka jaka ba ki shong die dukan ha jingkieng Motphran namar ba ka don ha ka jingma ban sa khyllem.
Haba kren mynta ka sngi, hadien ba ki ladep iakynduh ia u Additional Deputy Commissioner u Bah Cyril VD Diengdoh, ka president katei ka Synjuk ka Kong Sarolin S Wanniang ka la iathuh ba ki la pynpaw ha khmat u DC ba kin nym mih na katei ka jaka haduh ba ka sorkar kan ai ka jaka kaba biang ym ban shu leit phah shong sha kano kano ka jaka ka bym don iew don hat.
“Ngin nym mih na kane ka jaka tad haduh ba ka sorkar kan ai ka jaka die kaba biang”, la ong ka Kong Wanniang.
Ka la iathuh ba baroh kiba shong dukan ha jingkieng Motphran ki don kumba 60 ngut eiei bad ki ba la dei kiba la shong dukan da ki phew snem.
“Ha ka jingshisha ka sorkar naduh mynshwa ka la kular ba kan ai jaka ia ngi ban shong dukan hynrei haduh mynta kam shym la ai ia kata ka jaka, la bun ki Myntri sorkar kiba la wan bad bun ki la kular ban ai jaka katba haduh mynta ym shym don ba ai”, la ong ka President katei ka seng.
“Katba ngim pat ioh dukan ngin shong beit hangne”, ki la ong.
U Nongialam ka KSU u Bah Kynpham Kharlyngdoh u la ong ba ha ka jingiakren bad u DC u la kular ba un nym pat kyndang namar ba u dang khot ia ka jingialang ia ka Municipal bad u Syiem Mylliem ha kane ka sngi Balang ban wan.
U la ong ruh ba u DC u la ong ba ia ki jaka die jain jong kitei ki nongshong iew yn sa iakren ha katei ka sngi ia ka jaka ba kin ai ia ki ban shong.
Kumjuh ruh u nongialam ka FKJGP u Bah Elton Warjri u la ong ban a ka liang ka seng ka dawa na ka sorkar ba kadei ban ai jaka shwa ia kitei ki nongshong iew shwa ba kan pynpra.
Ha kawei ka liang pat u DC ha ka jingpynpna ba la pyllait ba la pynjari da ka kyndon 144 Cr.P.C da kaba mana ban ym shah shuh ban shong dukan ne ban die jingdie halor katei ka jngkieng namar ba ka la tlor kaba lah ban khyllem ha kano kano ka por khamtam lada wan u jumai.
U la mana ruh ba nym shah shuh ban ia iaid paidbah halor katei ka jngkieng bad kane ka hukum kan treikam mardor.
Lah ban kdew ba ha kane ka sngi siatjain ki bor na ophis u DC ryngkat ki briew na Shillong Municipal Board bad na kaophis jong u Syiem Mylliem ki la pynlong ia ka jing jurip ia katei ak jingkieng bad kila bthah ia kitei ki nongshong iew jingkieng ba ki dei ba mihnoh na katei jaka bad lada ki dang bteng ban shong ha katei ka jingkieng kin shim hi ia ka jingkitkhlieh lada jia eiei.