Ai ia ki minister, kin ia dih ia katei ka um Uranium, shi taiew, ar taiew, ngin sa ia peit, kaei ka ban jia, ong u stad mariang

U Bah Wanbantei Bremley Lyngdoh, uwei na ki riew ieid mariang, uba la pule bniah ia ka kam sumar mariang na ka skul bah ha London, u pynpaw ia ka jingsngewkhia kaba jur halor ka jingtuid ka um jaboh Uranium sha ka thain Domiasiat, kumba la paw ha ki kotkhubor ha ki khyndiat taiew ba ladep.

Ha ka jingiakren bad U Rupang, U bah Bremley, u pyn kynmaw ba ula leit jngoh ia katei ka thain Nongbah Jynrin, ha u snem 2005 bad kumjuh ha u snem 2009 bad utei u samla rangbah, u iathuh ba ha ka jingleit nyngkong jongu ha u snem 2005, u la kyndit ban iohi halor ka jingtrei jong ka tnat Atomic Energy ha katei ka thain, ha kaba ki la shu iehnoh khongreng ia katei ka jaka, kaba ki la dep tih ia u mar Uranium bad ka jingkhang, ka dei hadien ba U bah BB Lyngdoh, myntri rangbah ka Jylla (ha katei ka por), ula phah khang ia katei ka jingtih Uranium. “Nga tharai ki khang ha u snem 1993, ia kito ki AMD, i phah khang I Mama Bring bad ula shu ia ieh la ka ieh ki tiar, ki lyngka, ki khiew ki jain, ki but … phah khot biang ha 95,96, ki sa shna kein ia ki dam 4 tylli” ong U bah Bremley.

U bah Bremley, u iathuh shuh shuh, ba haba u leit biang sa shisien ha u snem 2009 bad ha katei ka por, u iathuh ba kiba bun ki kynroh kiba la sdang twa, namar ba la shu shna torti ia katei ka jaka tep ia ka jaboh Uranium bad u iathuh shuh shuh ba kam don ka jing maramot kaba biang bad kumta katba nang iaid ka por, ka la nang twa katei ka pung set jaboh Uranium bad mynta, ka la jur shuh shuh ka jingtwa bad ka jing orpait jong katei ka jaka set ia katei ka jaboh.

“Nga ong mo ia U Conrad, khie leit peit khlie leit seal ia kitei ki tank, hynrei u ong ba nga ioh report na ki briew jongngi, ba kim lei lei bad nga ong, kumno phi ong kumta nga ong peit ba ki don ki crack bad nga ong ngan leit peit bad ngan sa iathuh ia me, ngan sa ring phlim. Te nga leit shisha, tangba mynta pat ki la dep pyndap lut baroh khoit. Ki la phah ki AMD, nga tharai last week, ki shu pyndap malu mala” ong shuh shuh U bah Bremley Lyngdoh.

La iathuh shuh shuh U bah Bremley, ba ula leit test ia ka jinglong ka radio active ha katei ka jaka bad ula hiar ruh sha kawei ka wad duid, kaba hiar sha Ranikor, ha kaba ula lap ba ka jingkhlain jong katei ka radiation, ka long 360 counts per minit. “Te ka lah dei hi kein ia ki dohkha ba kin iap” bad U Bah Bremley, u iathuh ba lada ka radiation, ka la palat ia ka 100 counts per minit, kumta ka la pynlong ia u briew, ba un ioh pang kansar, hynrei lyngba katei ka jinglap jongu, kaba 360 counts, ka la long ka jingma kaba khraw haduh saw shah.

U Bah Lyngdoh, u iathuh shuh shuh ba ka tnat Pollution Controll Board, kam don tiar satia ban test ia ka radiation, kaba don ha katei ka jaka bad kumjuh ha katei ka um bad kumta, katei ka um, kaba don radiation, ka la long bih bad kiba dih ia katei ka um, kaba tuid sha Ranikor bad sha kiwei ki shnong, kin lah ban ioh pang beit.

Kaba U bah Bremley, u dawa namarkata, ka long ba kan don ka jing tohkit kaba laitluid halor ka jinglong bih katei ka um bad katei ka pung kaba la pynlang ia ka jaboh Uranium ha Nongbah Jynrin bad dei ban test ia ka khyndew, kaba don ha katei ka jaka, namar ba lada ka khyndew, ka long radio active, kumta ki jingthung jingtep, kin kylla bih ia ki briew, ki mrad bad ki mrad ba im sha katei ka thain.

U Bah Bremley hi u iathuh ba ki don lai jait ki jingma kiba ktah na ka radio active bad ka jingktah ka radiation ka long “Ka um, ka lyer bad ka khyndew”.

Utei u samla rangbah, ula ong biang “Lada kine ki myntri sorkar, ki kyntait ia ka jingma na ka radiation, kumta ai kin dih ia ka um na katei ka wan bad ngin sa ia peit, ia kaei ka ban jia bad katno phin shan slem”.

“Ai kin dih shi taiew, ar taiew bad ngin sa ia peit ia kaei ka ban jia” ong shuh U Bah Bremley bad utei u samla rangbah, u ong shuh shuh ba ka jingtrei kam jong katei ka bih, ka long haduh 5 Kilometre sawdong na ka jaka ba ka don ka jingtih ia u maw Uranium, ha ka jingiakren bad U Rupang. [na bynta ka interview kaba bniah sngewbha peit ia ka youtube jong u rupang.com]