Ai dorkhas ka CSWO ha U Rijiju ba donkti ki politishian bad ki pulit

Shillong, 19 Nohprah:
Ka CSWO hapoh ka jingialam ka Kong Agnes Kharshiing ka la aiti ia ka dorkhas ha u myntri khynnah tnad kam poh iing ka ri u Kiren Rijiju mynta ka sngi ha Shillong, da kaba kyntu ba un leh eiei pyrshah ia ka kam bamsap ha kane ka jylla kaba la donkti da ki politishian bad ki pulit bad ruh ka jingbanbein jong ki
kynthei.
Ha ka dorkhas ba la aiti ha u myntri, ka CSWO ka la ong ba ki kam thombor kam beain ki la nang kynrei ha kane ka jylla pyrshah ia ki kynthei, nalor ka bamsap bampong kaba shyrkhei ha ki tnad sorkar bapher bapher kynthup ka bam sap ha ka tnad pule puthi hynrei kam shym la poi shaei shaei ruh namar ba kaba donkti dei ka myntri sorkar bad ki pulit ki buhrieh ia ka jingshisha baroh.
Ka CSWO ka la ong ruh ha ka dorkhas, ba ka bamsap ha kane ka jylla ka la shlei miar namar ka jingdonkti ki pulit, ki politishian bad ki ar sorkar bad haba don kano kano ka jingujor na ki paidbah, kampoi shaei shaei ruh hynrei ki shah byrngem kylla pynban ban pynngat haka ain.
Ka CSWO ka la ong man ka por ba ka seng ka ieng pyrshah bad ujor haki pulit ia ki kam bamsap bad ki kam thombor ia ki kynthei, ka laiakynduh jingeh namar ba ki pulit kim leh eiei hynrei ki leh ia kabahukum ki politishian kaba pyrshah pynban ia kipaidbah. “Ia u numberphun jong nga ruh, la tap da ki pulit bad ia kane la iathuh da u hehpulit ka jylla”, la ong ka President ka CSWO ha ka dorkhas ha uRijiju.
Bun ki kam bamsap ba la donkti ki heh sorkar kimju iaid kam kum kabamsap thungkam ha ka tnad pule puthi namar ba la donkti da ka myntrisorkar bad ki pulit kim leh eiei wat ka CBI ka la lap tyngkrein iakane, la ong ka CSWO ha ka dorkhas. Ym tang kine, ki kam pyniap briew jong ki pulit da ka jingkam bymdei, ka jingbym leh eiei halor ka jingujor haba jiaka jingshah banbein ki kynthei nalor ka byrngem pynban iaki biriew kiba ujor ejahar,ki dei ki kam jong ki pulit ban pyntieng ia ki paidbah da kaba donktiki heh sorkar politishian napoh napoh. Halor kane, ka CSWO ka la kyntuia u myntri ban leh eiei banpynshitom ia ki briew kane ka sorkarjylla khnang ba ka hok kan ieng biang.