Ai dorkhas ka BJYM ha u  myntri ba ioh baibam slem

Shillong, 18 Risaw:
Ka tnad samla ka BJP ka MJYM ka la aiti ia ka dorkhas ha u myntri ba peit ia ki riewlum ha ka jingwan jngoh jongu dang shen ia ka jylla. Ha Ka BYJM ka la kyntu ia u myntri ka sorkar pdeng ba  un tuklar ban pyn thikna ba ka baibam jong ki samla pule ha kane ka jylla kan poi ha ka por kaba biang bad kaba thikna.
U president ka BJYM u Bah  Egenstar Kurkalang u la ong ba ha kane ka jingiakynduh markhmat bad u Myntri riewlum, ka BJYM ka la rah ruh shibun ki mat kiba iadei bad ka jingdonkam ba kane ka tnad kan leh na ka bynta ki riewlum khamtam kiba iadei bad ka pule puthi.
U la kyntu ia u myntri ba un tuklar ba ka sorkar Meghalaya ka dei ban pyntreikam thikna ia ka baibam jong ki samla ban pynlait ha ka por kaba biang namar ba kumba ka long mynta ka long thurmur bha ka rukom leh na ka tnad ka pule puthi ka jylla.
U Bah Kurkalang u la ong ba ha ka jingshisha ka jingthmu ba kongsan jong ka sorkar pdeng ban ai baibam ia ki samla pule riewlum ka long ban pynlah ia ki ban siew ia ki jingdonkam bad ban thied ia ki kot pule khamtam kito ki longiing ba wan na longiing ba duk hynrei sngewsih ba kane kam shym la urlong satia ha kane ka jylla ha kaba ki samla pule ki ioh ia ka baibam hadien ba la dep ban pule pynbna bad ka la shim por slem hadien shi snem ar snem.
Ka jingbai rung klas ha kane ka jylla ka long kaba rem bha bad bun na ki kolej haba ianujor bad kiwei ki jaka pule shabar. U la ong ha kane ka jylla Meghalaya na ka bynta ki klas XI bad XII ka jingsiew ka la poi sha ka T. 6000/- bad ia kiba pule ha ka B.A bad B.COM ka long palat ia ka T. 12000/ bad ia ki B.sc ka long palat ia ka T. 15000/-  bad ia ki professional courses  ka long haduh T. 30000/ katba ha kiwei ki jylla ka long tang T. 2500/-  ia ki B.Sc bad  BA,LL.B  ka long T. 1500/- katba ia ki klas XI bad  XII ka long tang T. 800-1000/- .
U la ong ruh ba ki samla pule kiba sah hostel ha kane ka jylla kim shym la ioh ia ka jingiarap wat tang ia ka bai leit bai wan wat ha ka jingshisha ki kolej ki ioh pisa na ka UGC Grant  bad  na ka tnad Minority Affairs bad ka Tribal Affairs bad ruh na tnad DoNER Na ka liang ka BJYM ka la kyntu ia ka sorkar pdeng ba kan tuklar baka sorkar kan thaw ia ki kyndon lane ka polisi kaban iahap bad ka jingpule jong kane ka thain khnang ban weng noh ia ka jingbym ioh kam bym ioh jam ha kane ka jylla.