Ai da ki kot ba shu thok, ban ioh jingtrei T.59klur, ong ka HNYF

Shillong:Ka seng Hynñiewtrep National Youth Front (HNYF), ha kine ki khyndiat bnai ba ladep, ka la lap ïa ka kam thok jong kawei ka Kompeni shna surok kaba la tip kyrteng kum ka M/s Kampung Kamyer Trading Co na Aruna chal Pradesh ba la mih khmat da u Abhilash Kishore Kashyap da kaba u ai sha ka sorkar, da ki kot ki sla kiba thok ban ïoh pyntrei ïa ka surok Jowai Bye-Pass sha ki thaiñ Amlarem kaba kot kumba 59, 88,88,870( sanphewkhyndai klur phraphew-phra lak phraphew-phra hajar phraspah hynñiewphew tyngka) ba bei pisa da ka sorkar pdeng lyngba ka tnad Ministry of Road Transport and Highways (MoRTH).

Hadien ba ka HNYF, ka la suba sniew ïa kane ka kompeni, ba ka ai da ki kot ki sla kiba thok sha ka sorkar ka HNYF, ka la wad jingtip kaba bniah bad hadien ka jingwan bniah ka HNYF ka la shem ba kane ka kompeni ka la ai da ka Performance Bank Guarantee, kaba thok ban ïoh ïa ka tender ban ïoh trei ïa kane ka surok.

Dei hadien ba ka HNYF, ka la lap ïa kane ka kam thok ka kompeni na ka liang ka seng ka la leit ban pynsahngeh noh ïa ka jingpyntrei ïa kane ka surok ryngkat bad ki jingai jingtip sha ka tnad PWD bad ruh ban leit ïa kynduh ïa u Chief Engineer ka PWD ban peit biang ïa ki kot ki sla kane ka kompeni.

Kat kum ka jingïathuh jong u Samla Tyllibor Swer Asst General Secratary ka HNYF East Khasi Hills, u la ong ba hadien ba ka seng ka lap ïa kane ka kam thok, ka la pynsngew sha ka tnad PWD bad sha u Chief Engineer, hynrei na ka liang jong ki ki kam ba ki kot kiba kane ka kompeni ka ai, ki dei kiba biang bad kiba shisha.
Dei hadien ba ka HNYF ka la lah ban sei ïa ki sabut kiba thikna pyrshah ïa kane ka kompeni ha khmat u Chief Engineer, ba na ka liang jong ka tnad ruh ka suba sniew ïa kane ka kompeni bad ka wad ïa ka jingshisha.
Na ka liang ka tnad, hadien ka jingwad bniah ïa kane ka kompeni, ba ka la lap ïa kane ka kam namar ki kot ki sla kiba kane ka kompeni ka la ai sha ka sorkar ka la lap ïa ka jingshisha kumba la kam da ka HNYF bad na ka liang ka sorkar ruh ka la pynsahngeh mardor ïa kane ka jingtrei da kane ka kompeni da kaba ka ai ruh ïa ka termination letter ha ka 19 tarik Jymmang 2022.

Hadien ba ka HNYF ka la lap ïa kane ka kam shukor jong kane ka kompeni na ka liang ka HNYF ka la leit ban ïakynduh ruh ïa u Bah Prestone Tynsong u Symbud Myntri Rangbah ka jylla ba peit ruh ïa ka tnad PWD Road, ban pynsngew ïa ka jingeh ki trai muluk kiba la shim pateng ban pyntrei ïa kane ka surok na ka daw ba ka sorkar ka la pynsahngeh noh ïa kane ka jingtrei namar ba shuwa ba ka HNYF, kan lap ïa kane ka kam thok kane ka kompeni ka la aiti pateng ban pyntrei ne ai sub-contract sha ki trai muluk ban pyntrei ïa kane ka surok.
Haba kren sha ki lad pathai khubor, hadien ba la mih na ka kamra jong u Bah Prestone u Genral Secretary ka HNYF East Khasi Hills u Bah Donlang Nongbri, u la ïathuh ba ka jingïakynduh ka long ban kyrpad ïa u Myntri ba ka sorkar kan peit lem ïa kine ki Kontraktor trai muluk da kaba kan ai trei biang ïa ki ynda ka la khot tender thymmai khnang ba ka jingpynlut jong ki ha kaban pyntrei ïa kane ka surok kan nym long lehnohei.
Shuh shuh haba bynrap lang, na ka liang u Assistant Genral Secretary ka HNYF East Khasi Hills u Samla Tyllibor Swer u ong ba na ka liang ka seng, ka la buh jingkylli ruh ïa ka rukom treikam ka sorkar bad ïa ka tnad hi baroh kawei ba kumno kam lah ban peit bniah ïa ki kot ki sla jong ki kompeni ha shuwa ban aiti ïa kino kino ki projek kiba ka mang da kaba buh jingkylli ruh ba kumno kat ka sorkar ka dang ngop ha ki kam thok jong ki kompeni kiba na shabar jylla.
Kat kum ka jingïathuh jong u Samla Tyllibor, u ong ba ka jingsdang sngewthuh jong ka HNYF ïa ka kam thok kane ka kompeni ka long hadien ba ïa ka Performance Bank Guarantee kaba ka la ai sha ka sorkar lyngba u Abhilash Kishore Kashyap, ka dei kaba naduh na Pune, namar ki tnad treikam jong ka Bank, kaba dei ban ai ha ka jingshisha ki don ha Shillong, katba une u briew pat u wanrah naduh na Pune.