Ai burom U Mukul ialade na ka skhim IBDLP: James

Shillong, 19 Lber:
U MLA ka NPP u James K Sangma u la ong ba u Myntri Rangbah marwei u la shim bad ai nam hi ialade ia ka jingpyntreikam ia ka skhim Integrated Basin Development Livelihood Programme (IBDLP) kaba u ju khot kum kata ka Flagship Programme ka sorkar MUA. Kane ka jingleh jong u Myntri Rangbah ka la ktah ia ka jingsngew jong kiwei ki para myntri sorkar kiba aiti met bad mynsiem ban peit ia ka jingiaid ki kam ki jam, la ong u James K Sangma haba wanrah ia ka mat halor kane ka skhim hapoh ka iing dorbar hynne ka sngi Palei.
U James u la ong ba kane ka skhim kaba u Myntri Rangbah u Dr Mukul Sangma u la kam ba ka dei kaba iaid kam bha, ka dei kaba shu thok, namar ba ka long kumba tied u pyrthat rkhiang hynrei khlem hap slap satia.
“Ka IBDLP ka dei tang kum ka Multi Purpose Vehicle ban pynthiang pynbiej ia ki paidbah, hynrei ka kam pat kam ler eiei”, la ong u James.
 Ia kane ka skhim la ai nam bad la pynkiew skong hi u myntri rangbah marwei bad leh lyndet ia kiwei ki myntri sorkar, la ong u James.
Nalor kata, u la kynnoh ba kane ka skhim ka dei tang kawei pat ka kyrteng ba shu ai, hynrei ki kam ki dei ki juh ba la leh da kiwei ki tnad sorkar bad kam shym la don kano kano ka kam kaba thymmai.