Ai burom ka Shnong Umsyiem, ba noh synniang U Tymmen Basan

Shillong: Ka dorbar Shnong Umsyiem, ka pynpaw ia ka jingsngew nguh kaba khraw ia U bah Olando Kongwang, uba dei u riew rangbah jong ka Shnong bad uba dei ruh U Tymmen Basan jong ka Balang Presbyterian, Umsyiem,  halor ka jingsbun mynsiem jongu, ban iarap kylluid mynsiem, da ki tiar bam bad ki jhur ba bunjait sha baroh ki longiing jong ka Shnong Umsyiem, ha kaba la sam paidbah ruh ha ki ar sngi ba ladep sha ki nongshong shnong kiba donkam. 

Ha ka jingkren sngewnguh sha utei u Rangbah shuwa ban sam iaki tei ki marbam, U bah Sanjeev Kongwang, Rangbah Shnong, ula ong “Ngi sngewthuh shai, ba ka jingnoh synniang jongphi, ka shongdor rem shibun ha ka dor jong ka pisa, hynrei namar ka jingieid jongphi ia ka Shnong bad ia ki nongshong shnong baroh, phim shym la sngew bynnud ban sei na ka pla jongphi bad ban ai sha ki paidbah jong ka shnong, ha kaba kum kane ka por jong ka jinghiran ha ka pyrthei hi baroh kawei. Ngim don eiei ban siew kylliang pat ia phi, hynrei ngi kitbok ba phin ioh ia ka met kaba koit ba khiah bad ba phin nang lah ban shakri ia u paidlang ka Ri Khasi Jaintia, lyngba ka sap ai dawai kynbat jongphi bad kumjuh ruh, ba phin ioh ia ka met kaba koit ba khiah bad ba phin nang ioh ia ka bor ba maian na U Blei Trai Kynrad, ba phin nang lah ban bteng ia ka jing shakri jongphi ruh ia ka Balang ha Umsyiem bad ha ka Ri Khasi Jaintia hi baroh kawei”.  

Ban shu pynkynmaw, U Tbn Bah Olando Kongwang (65)snem ka rta, u dei uwei na ki nong sumar kynbat, uba la paw bha jong ka Ri Khasi Jaintia ha ki 20 snem ba ladep bad ka jingsumar jongu, ka la iarap ban pynjem ia kiba bun ki jingpang kiba har rukom.Dei da ka jinglah bad jingtbit jong u ban sumar ia kiba iohpang Tumor haki snem bala leit, utei u Tbn Rangbah, ula iohlad ban iaid kylleng ka Ri India da ka jingbthah ka sorkar Meghalaya ban pyntbit shuh shuh ialade bad ban ai jinghikai ruh iakiwei ha kaba iadei kumno ban sumar bad pynkoit iaki jingpang ba har rukom bad haduh kine ki sngi, u ju ai dawai ha Dawki, ha Mawngap, ha Amlarem bad kumjuh ha la shnong ha Umsyiem.