Ai bor ki Rangbah Shnong, ban tih khyndew pathar ha Byrnihat: Syiem Marwet

Shillong,14 Naitung:
U Pa’iem Ken Syiem, U Syiem ka Raid Marwet u la kynnoh ba jingtih pathar ia ki khyn dew ha shi lynter ka sur surok kum ha Byrnihat bad kiwei pat ki jaka ri-Bhoi kiba hap ha ka Raid Marwet, ka long khlem ka jingtip jong u Syiem ha kaba u la ong ba la ai bor hi tang da ki Rangbah shnong jong ki Shnong kiba hap hangtei. Haba ki nongthoh khubor ki la kylli hato ki kham donbor ki Rangbah shnong ban ia u Syiem ba ki lah ban leh kumta khlem ka jingtip u Syiem, u Paiem Ken u la ong ba ka Raid kan sa shong pyrkhat bad hadien kata lah ruh ban pynshitom bad ban weng shisyndon ia kitei ki Rangbah shnong kiba la ai bor kumta.
Shuh shuh haba kren sha ki nongthoh khubor u Bah Syiem ka Raid Marwet, hima Mylliem u la ong ba ki rangbah shnong kiba hap hapoh ka jingpeit jong ka Raid marsien Sanad ki la sngewheh bad kim khein snep shuh ia u Syiem bad ki leh la ka mon la jong. U la kynnoh ruh ba dei namar ki jingleh ba stad kiba kum kitei ki Rangbah Shnong ki sa mih bun ki jingkulmar hapoh ka Raid kum kato ka jing iakajia kam ai jaka ia ka Ratna Gogoi. U la byrngem ruh ba ka Raid hadien ba la lap ia ka jingshisha kan kyndang bad weng noh shisyndon ia kiba kum kitei ki Rangbah shnong.
Lah ban pynkynmaw ba ha shilynter ka surok ha Ri-Bhoi khamtam ki Surok sha ki thain Byrnihat la iohi ba ki la shu saw lut ki khyndew namar ka jingtih pathar jong ki kompeni bapher bapher na ka bynta ki jingshna bapher bapher jong ki.