Ai ban thaw noh ma ngi, kob ka BJP Meghalaya ia ka Congress

Shillong, 7 Nailur:
Ka Meghalaya State Bharatiya Janata Party (BJP) ka la kob ia ka Congress ba lada kam lah ban thaw ia ka ain mar poh khyndew, ka dei ban aiti noh ha ka BJP ba kan leit sha ka sorkar pdeng, ban thaw ia ka wat la ka la shah bthah ha ka National Green Tribunal (NGT) ban thaw ia ka la 15 bnai mynta.
Ha ka jingpyllait khubor, u  General secre tary ka BJP Meghalaya u Dipayan Chakraborty u la ong, “Ka sorkar ka dei ban aiti noh ia ngi lada kam lah ban thaw ia ka, khnang ba ngin leit sha ka sorkar pdeng”.
Ka BJP ka la buh jingkylli ia ka jingbym lah ka sorkar ban thaw ia ka Mining Plan namar ba ka National Green Tribunal (NGT) ka la hukum bun bnai ia ka sorkar.
“Kam long kaba shai lano ka sorkar jylla kan sa lah ban thaw ia ka Mining Plan”, la ong u Chakraborty ba ka jingbym ler ka sorkar ka la ialam sha ka jingslem bad ka la wanrah jingeh ia ki paidbah.
U la ong ba ka NGT ka la pruid dak ia ka sorkar Meghalaya ban pynkhreh ia ka Mining Plan ryngkat ki jingiada ia ka mariang watla dei ban tih ia u dewiong, mawshun.
“U Myntri Rangbah ka jylla u  Dr Mukul Sangma uba peit ia ka Mining u dei ban ai ia ka jubab sha ki paidbah halor kane ka jingler ka sorkar ban thaw ia ka Mining Plan”, la ong u Chakraborty.
Ka jingbym lah ka sorkar ban thaw ia ka  Mining Plan ka la wanrah ia ka jingeh ia ki paidbah ha ka jylla hadien ba la khang ban tih dewiong ha ka jylla, la ong ka BJP.