Phah ki pulit ka Assam, ia ka kaiphod ka Kong Victoria

Shillong, 14 Naitung:
Ki pulit ka Assam ki la phah ia ka kaiphod jingtohkit kaba bniah sha U Inspector General of Police (IGP) ka Megha laya ha kaba iadei bad ka jingkhlad ka Kong Victoria D Kharkongor.
U Commissioner of Police, ka Guwahati u Mukesh Agarwal u la ong ba ki pulit ka Assam haduh mynta kim pat pynshitom eiei ia ka  International Hospital bad u la kyntait ba uwei na ki doktor katei ka hospital u la shah kem ha ki pulit.
Haba jubab halor ka jingkhlad ka Kong Berlin Kharkongor ka kmie ka Kong Victoria ban ai ia ki kot ki sla, ka kaiphod bad ki video CCTV ha kaba iadei bad ka jingkhlad ka Kong Victoria, une u heh pulit na Assam u la ong ba ki la ioh pdiang ia ka shithi na ka kmie ka Kong Victoria bad ki pulit ki dang eksamin ia kane ka kam.
“Kine ki dei ki rekod jong ka case bad ka rekod jong ka case ka dei ka nongkynti ka Kashari bad ki don shibun ki kyndon ain halor kane”  la ong u Agarwal.
Ka Kong Victoria D Kharkongor la lap ba ka la khlad ha painkhana ha Dispur police station ha Assam ha ka miet 5 tarik Naitung tang hadien katto katne kynta ba la aiti sha ki pulit da ka bor jong ka International Hospital, Guwahati, da kaba kam ba ka la thaw jingkulmar hapoh hospital hadien ba pdiang ia ka ban sumar. Ha kane ka sngi u Blei ki pulit ka Assam ki la wan tohkit ruh ia ka kmie ka Kong Victoria Kharkongor ha jaka sah jongka ha Shillong.