Kyiv:Ki pilot jong ka Russia, ki la shah ring video, hadien ba ki liengsuin jongki, ki la shah siat pynhap ha ki shipai ka Ukraine bad la iathuh ba hynnin ka sngi, ki don 9 tylli ki liengsuin iapom jong ka Russia, kiba la shah siat pynhap.
Ha ka jingring video, kitei ki pilot, ki iathuh ba ki shu kohnguh, ia ka hukum ba la bthah ia ki, ba kin leh.
Ha ki dur, la pyni ruh ia ki liengsuin iapom ka Russia, kiba la shah siat pynhap, katba ki nongniah, ki la shah kem noh, hadien ba ki la kynthih noh ialade da ki parachute na kitei ki liengsuin jongki. La kem ia kitei ki shipai suin, da ki riew paidbah lem bad ki shipai ka Ukraine.
La pyni ha ki dur, ia kitei ki shipai suin, kiba la shah teh ia ki kti jongki shadien, ha kaba ki la don ruh kiba la mynsaw, ha ka jing pyllait im jongki ialade na kitei ki liengsuin.
Ka Ukraine, haduh mynta ka sngi, ka kam, ba ka la ioh ban pyniap ia 11 hajar ngut ki shipai jong ka Russia, kiba la hiar thma ia katei ka Ri, ha ki khadwei sngi ba ladep bad la iathuh ba ki don sa 2 hajar ngut ki tiar ialeh kiba la shah pynjulor ha ka Ukraine. Lyngba katei ka jingkhein, ka pyni, ba ka Russia, ka duh ia shi hajar ngut ki shipai ha ka shisngi. Ha kawei pat ka liang, ka Russia ruh, la shim ba ka la pyniap ia bun spah ngut, lane da ki hajar ngut ki shipai bad ki riew paidbah ha Ukraine, ha kaba ki don kiba antad, ba kiba iap, ki la poi sha ka 2hajar ngut.
Ki lad khubor, ki iathuh shuh shuh ba ki shipai ba satar jong ka US, ki dang hikai pyntbit bha ialade, na ka bynta ban leit sei ia U President ka Ukraine, U Volodymyr Zelenskyy, ha kano ma ka por, ba ka don ka jingthmu ban pyniap ia u. Ki don mynta 70ngut ki shipai ka UK bad sa 150ngut ki shipai ka US, lane ki Navy Seals, kiba don ha Lithuania bad kiba dang pynkhreh bha, ban pyndep ia katei ka kam, kaba shyrkhei bha, lada ka idonkam bad kitei ki ia hikai lang bad ki shipai ka Ukraine.
Ka US, kham mynshwa, ka tyrwa ban shim noh ia U Zelenskyy, na ka jaka sah jongu ha Kyiv, hynrei, U President, ula kyntait, da kaba u ong “Nga donkam ia ki tiar siat, ym dei ban shong liengsuin”. La iathuh ba ki shipai ba kyrpang ka Russia, lane ki Russian Spetsnaz, ki thwet jur, ban ioh siat iap ia utei U President, uba 44 snem ka rta.
Phi don ban ong eiei?