Ka nusip jot ki ASHA

Ki nongtrei ASHA, ki la ia mih madan ha kine ki sngi, ban pyrshah ia ka jingsiew bai nong jong ka sorkar ia ki bad ha shwa, ba ngin iatai ia ki mat jongki, ngin ia kynmaw ba ASHA, ka mut Accredited Social Health Activist.

Ngim tip bha satia, ia ka rukom iateh hapdeng ka tnat ka koit ka khiah bad kitei ki nongtrei, namar haba shu ia antad, kitei ki nongtrei kim dei satia ki nongtrei ba pura jong katei ka tnat, hynrei ki dei kiba la shu siew bai burom lane honorarium, kaba ar hajar shibnai lane kumba ki iakhein, kan long kumba 66 tyngka shisngi.
Kat kum katei ka dor, ka la dei ia ki ASHA, ba kin kyntait naduh ba sdang, ban shimti ia katei ka kam; hynrei (lehse), ha ka kyrduh kam, ha kaba wat ki nonghikai ruh, kiba pynlut por haduh 7,8 kynta shisngi, ki dang ia treh hi, ia katei ka kam, ha ka dor kaba ar lane lai hajar shibnai bad ka dei ha katei hi kajuh ka jingkhein, ba ki nonghikai ruh kumjuh, ki ASHA ruh kumjuh, ba ki rung sha katei ka kam bad ki sa ia kynduh mawsiang pynban ha kine ki sngi.

Mynta ki dawa ia ka bainong, kaba kham heh bad la iohi, ba ki kwah ban ioh noh 300 tyngka shisngi, lane sha ka 12hajar shibnai bad ngim tip, la ka sorkar ka lah ne em ban pdiang ia katei ka jing dawa jongki, namar ba kam shai ruh, la katei ka pisa, ka wan na ka pla kaba kumno bad ba la ka wan na ka pla kaba siew tulop ne ioh lehse, ka wan pynban, na ka pisa kaba shu tam naei re naei.

Ki nongtrei ASHA, ki la byrngem ba kin leit sahmiet noh ha Secreteriat, lada jia ba kim ioh ia katei ka bai nong thymmai jongki bad ka sorkar ruh, ka la dei ban pyrkhat, ba ka jing kitkhlieh jong kitei ki ASHA, ha ki shnong ba ki don ka long kaba khia shibun, khamtam ha kum kine ki sngi, ba ka sorkar ka iit bniah bha ia kiba pang ba shitom, kiba armet, ki khyllung bad ki ASHA hi, ki la dei lypa kiba don ha syndah jong ki Health Centre, ki PHC bad wat ha kine ki por corona ruh, ki dei pynban ma ki, kiba wan ha khmat bad kiba iarap lem ia kito kiba don ha ka jingpang corona, kiba shong kyrpang bad kiba shah set kut ha ki iing ki sem jongki.
Ki nongtrei ASHA, ki don ha kylleng ka India bad ki ioh ia kajuh ka bai burom bad ka la dei ia ka sorkar India ba kan kyntiew malu mala bad ka sorkar jylla ruh, ba kan pynnoh katto katne, ba kin kham ia ryngkat briew, ka jing ioh kamai.