Tuklar hi ka kashari, ia ka khaii tuh dewiong

Ka jingdie tuh dewiong, ka la jubor la palat liam, ha kine ki sngi, ha kaba wat ka sorkar jylla, ruh, ka la rem halor kane ka kam bad na kaei kaba paw tyngkrein, ka pyni pynban, kumba ka jingtuh bad ka jing iai tuh, ka kylla long noh ban sngewthuh, ba kam dei shuh ka jing tuh lane ha kawei ka kyntien, kaba ki ju ong ka jingtuh mynsngi mynshai.

Pyllein pyllein, la iohi, ba ki kali kit dewiong, ki kali kit coke, ki iaid da ki phew tylli man ka sngi, ha ki surok bah bad wat ha ki surok jong ka nongbah Shillong, hynrei kitei ki iaid khlem salia satia, la kumba iaid ki trok kit masi sha khappud Bangladesh.

Ka jingkren pyllait met jong ka sorkar jylla, da kaba iai pynbor ia kiba lap, halor ka jingkhaii tuh dewiong; ba kin ujor ejahar sha ki pulit, ka la urlong shisha ha kane ka kynti, ha kaba ka Meghalaya High Court, ka la sat sia; da kaba baroh ki nong bishar katei ka Court, kin shong tohkit ia ka mukotduma, ha ka 7tarik Lber 2022.
Haba shu peit, ia kane ka kam tuh dewiong, la iohi, ba ka la dei shisha, (kumba ki ju ong), ba kiba donkti ki dei kita ki high level, lane ki heh kyrdan bad katei ka dei ka kam jong ki riew don burom, kiba kamai pisa da ki lak tyngka, na kawei kawei ka trok bad ka dei ruh (lehse) na katei ka daw, ba ki sa nang pynslem ban wad ia ki lad ki lynti ban pyllait ia ka jingtih bad ia khaii paidbah ia u dewiong, namar ba mynta, u iaid lyngba ka kti jong kitei ki mentuh suda.

Ka mat kaba kongsan, kaba ngi dei ban kynmaw hangne, ka long ba ki seng kiba don ha kane ka sorkar, lada dei ka NPP, ka BJP lane wat ka UDP, ki la dep kular, na ka bynta ban pyllait noh mar mar ia u dewiong (lada kin wan ha ka sorkar), ha ka elekshon 2018; hynrei katei ka jing kular jongki, ka kylla khongpong ha kine ki sngi, ha kaba u dewiong, um shym lait paidbah satia, hynrei, u shu lait pynban, tang ha ki heh bor heh sor, kiba don jing iasnoh bad ka sorkar.

Ka elekshon, ka la poi noh artad bad lada kane ka sorkar jing kular kam lah ban pyndep ia kaei kaba ka la khlei sha u paidlang ka Jylla, kumta ka la dei ban shah sympat, ha ki nongjied ha kane ka sien ka ban wan.
Lyngba ka jing shim rai tyngeh ka Meghalaya High Court, ka la dei ban pei shkor bad pyn urlong ia ka jingtih dewiong, katba kum ki ain jong ka sorkar India.