Don ka khyrdop pisa masi, khyrdop lum pisa dewiong, khyrdop mar rep, ong U Ma Pala

Shillong:U President ka Meghalaya Pradesh Congress Committee u Bah Vincent H Pala u la ong, ba na ka liang ka Ingkashari ka la dei ban thung da ka kyn hun tohkit CBI lane ka kynhun tohkit kaba laitluid halor ka jing kynnoh ba don ka jing tih bad khaii dewiong beain ha ka jylla.

“Ngam don eiei ban ong halor ka rai jong ka ingkashari halor ka jingthung ia ka Special Investigation Team (SIT) halor ka jingkynnoh ba don ka jingtih bad khaii dewiong beain ha ka jylla hynrei kat kum ka jingsngew marwei jong nga, ka long ba la donkam ban thung da ka kynhun tohkit CBI lane ka jingtohkit ba laitluid bad ban ym ailad ia ki ophiser lane ki pulit na ka jylla ban ioh bynta lang ha kane ka jingtohkit namar ba ki paidbah ki la mad ka jingeh ka jingeh ka bakraw na ka jingkhaii bad tih dewiong beain ha ka jylla ” la ong u Bah Pala.

U bah Pala u la kynnoh “Ki khyrdop beain hi, kiba don shi lynter ki surok bah ha ka jylla, ki dei ki ATM jong ka sorkar jylla, kumta ngam tharai ba na ka liang jong ka sorkar jylla kan shim khia ban weng ia kine ki khyrdop beain”.
“Lada phi leit na Shillong sha Nongstoin phin lah ban iohi ia ki khyrdop beain suda ha kaba tang poi ha Mawngap la don ka khyrdop ha jan ing u MLA kane ka Thain u bah Brol Nongsiej ruh la don ki khyrdop lada leit Nongstoin, sha Sonapahar ki khyrdop lum pisa beain suda “u la bynrap suda.

U bah Pala u la ong ruh “Lada iaid na bypass na Byrnihat sha Ratachera ki don haduh 22 tylli ki khyrdop lum pisa beain ha kine ki surok bah bad phin ym lap ha kano kano ka jaka ha ka Ri India ban don bun eh ki khyrdop beain kumba don ha ka jylla Meghalaya”.
“Ka don ka khyrdop ban peit ia ki masi,ki khyrdop ban peit ki mar rep,ki khyrdop ban peit ia ki, ki khyrdop ban peit ia u dewiong, ki khyrdop ban peit ia ki briew bad ki khyrdop ban peit ia ki khyrdop”u la bynrap.
U bah Pala u la kdew ruh “Haba iaid sha ka thain Iewmawlong shwa ban poi ha iewmawlong kan don ka wei ka khyrdop lum pisa beain bad hadien ba la kut ka Iewmawlong don sa kawei ka khyrdop lumpisa beain, ha Jowai by pass ki ar tylli ki khyrdop lum pisa beain ki don ha hajan hajan, katba ha Shillong by pass ki don haduh 6 -7 tylli ki khyrdop lum pisa beain” .

U President ka MPCC u la ong ba ka jingbuh ia kine ki khyrdop ha ki surok bah ka dei tang ka kam lute na ki paidbah, ha kaba ki paidbah hi ki mad ia ka jingeh kaba khraw.