Ka thma bah ba lai, kan dei beit ka thma niwkliar, ong ka Russia

U Sergey Lavrov, u myntri bar ri jong ka Russia, ula kren shai mynta ka sngi, ba ka thma bah ba lai, kan dei ka thma jong ki niwkliar bom bad kan dei ruh kaba pynjot thiaw ia ka pyrthei bad ula ong ruh ba ka Russia, kan nym shah satia, ba ka Ukraine, kan ioh ban buh ia ki tiar niwkliar ha katei ka Ri.

U Lavrov, ula ong shuh shuh ba ka Russia, kam sngew eiei satia ia ka jingkhanglad jong ka khaii pateng na ki ri sepngi, pyrshah ia ka Russia, hynrei, u sngewkhia ba ki ri sepngi, ki khanglad ia ki nongialehkai, ki nongthoh khubr bad ki nong ialehkai tynrai.

Ka jinghiar thma jong ka Russia ha Ukraine, ka la poi mynta la hynniew sngi kynthih, ha kaba ka jing ialeh ka jur bha ha Kyiv bad ha kiwe de ki nongbah kiba heh jong katei ka Ri.