Leit iarap ka FKJGP ban pynbha ia ka madan ha shnong Sohkhwai

Nongpoh:Ki nongialam ka FKJGP Sohkhwai Unit ha ryngkat ka jingiatreilang bad ki nongkitkam ka Soh khwai Sport Association (SSA), hynnin ka sngi ki la leit ban pynbha bad pynma dan ia ka Madan kaba don hapoh ka shnong Sohkwai, Ri Bhoi District.

Ha katei ka sngi kaba la pynbha ia katei ka madan, la sakhi da ka jingdon u bah Banroy Wahlang, President ka FKGJP ka Sohkhwai Umdu Unit, nangta u samla Faydee Nongmalieh, President ka SSA, u bah Tuma Namsaw, Rangbah Shnong ka shnong Sohkhwai lem bad shibun kiwei pat.

Haba iadei bad katei ka jingpyn bha ia katei ka madan, kitei ki nongialam ka FKJGP lem bad ki nongialam shnong, ki la ong ba ka daw kaba la pynlong ia ki ba kin pynbha hi ia katei ka madan, ka dei namar ba katei ka madan, kam long kaba biang ba biang, na ka bynta ban ialehkai ki khynnah hapoh katei ka shnong.

Ha kajuh ruh ka por, ki la pynpaw ia ka jingsngewdiaw mynsiem halor ka jingbymbiang ka madan ialehkai hapoh katei ka shnong. Kumta haba iadei bad ka jingthmu ban pynbha shuh shuh ia katei ka madan, na ka liang kitei ki nongialam, ki la kyrpad ia ka sorkar bad khamtam ia u myntri uba deipeit ia ki kam ialehkai, ba un phai khmat lem sha katei ka thain, kaba dang sahdien bad khamtam eh haba iadei bad ki kam ialehkai.

Nalor kaba ki kyrpad ba pynbha ia katei ka madan, na ka liang kitei ki nongialam, ki la kyrpad ban pynbiang ia ki jaka leit shabar, ki jingker ia katei ka madan lem bad kiwei de ki jingdonkam.