Kino kino kiba kam Khasi, tang ban shim kabu, kin ngat ha ka aiñ, ong U Bah Bindo

Shillong:Hadien ba la pynphai biang da u Lat ka jylla ïa ka KHAD Bill 2018 ka KHADC, na ka liang ki dkhot ka Advisory committee on law and Traditional Affairs, hadien ba la pynwandur thym mai kumba shisnem, ha ka Sngi Thohdieng, ki la leit ban aiti noh ïa ka Kaiphod jong ka KHAD (Khasi Social Custom of Clan Administration) Bill, 2018 sha u CEM ka KHADC u Bah Titosstarwel Chyne.

Kitei ki dkhot ka committee hapoh ka jingïalam u Bah Bindo M Lanong, MDC ha shwa ban leit aiti haba kren bad ki lad pathai khubor ki la ïathuh ba hadien ba la mynjur ïa ka Bill ha ka Dorbar KHADC ha ka 20.11. 18 la phah sha u Lat, hynrei la pynphai biang ryngkat ki jingai jingmut bad hadien ba ka EC ba mynta ka la aiti sha ka Advisory committee la shong ki jingïalang kumba shisnem ban ïoh pyn ryntih ïa baroh ki kyndon ha kane ka Bill.
“Lada lah pyn long aiñ kan wanrah jing myntoi shibun ïa ki Khasi, halor ka Kur ka jait, longkur longsem, rukom aijait shimjait, namar don kiba pynkylla jait phareng, don kiba shimjait na u Kpa, kumta ka Matphang ne Preamble kane ka aiñ kadei ban buh ryntih kumjuh ïa ka rukom dustur lyngba ka jingai jait na ka kmie (Matrilineal system,” ong u Bah Bindo.

U la ba kane ka aiñ kan pynskhem shuh shuh ïa ki riti dustur hyndai, ki Khasi kim dei ban shim jait shuh na u Kpa bad kane ka aiñ kan treikam noh marsien mynjur u Lat naba kane kan wanrah jingpynryntih ïa ki rukom aijait, laitnoh kito ki longïing ba la duhnoh ïa ki kynthei bym ïoh aijait shuh na ka kynthei kum sha Bhoi ba ki don ka Ringbia ka Shaw Bhoi.
“Ka Bill ka khang ruh ban pynkylla ïa ka jait da ki Affidavit hapoh ki ïingkashari. Ym lah ban spel dak bakla dei ban spel kumba buh ki kur. Lah ruh ban duhnoh ka jinglong Khasi lada shim kano kano ka aiñ shimet ne personal law ki bym dei Khasi kin ong ba ngi dei ki Khasi bad ki bym ïaid katkum ki kyndon ne aiñ buh ryntih,” ong u Bah Lanong.

U la ong ba kan don ka Tribunal Committee lada don ba shah thombor leh donbor, shah pynduh ki hok, haba kita ki lanot ki lah ban leit ud.
“Ka don ka jingpynshitom lada pynkheiñ ïa ka aiñ. Kino kino kiba pyrshang ban rungtuh ban kam Khasi tang ban ïoh shim kabu, kwah myntoi kin ngat ha ka aiñ. Kane ka Bill ka ai jingithuh da ka aiñ ïa ki Seng Kur, ki Rangbah kur khnang ba kin lah ban ai ïa ki Clan certificate ban applai Schedule Tribe Certificate,” ula ong.

Kane ka Bill ka kren shai ba baroh dei ban ai beit ïa ki jait ba pura, ym shiteng, ong ka advisory committee.
“Ngi la phah teng ïa kane ka Bill sha JHADC ban khmih, hynrei haduh mynta ym pat ïoh jubab mynta la palat snem, hynrei lah ïohi ba kin ïaid lang bad kane ka Bill namar ki don bun ki Pnar kiba sah sha Khasi bad bun ruh ki Khasi ba sah sha Jaiñtia Hills namar kumba la tip ki Khasi Pnar ki long shibynta jong ka Hynñiewtrep,” bynrap u Bah Bindo.
La ïathuh ruh ba na ka jingwad bniah jong katto katne ki riewshemphang la lap ba ki don palat 5 hajar tylli ki jait bad manla ki kur kidei ban don ka Dorbar bad kane ka Clan Bill ka kyrshan shuh shuh ïa ka Lineage Act, 1997.