Dawa CBI ka NHRCI, halor ka jingiap ka Kong Victoria

Shillong, 12 Naitung:
Ka National Human Rights Commission (NH RC) North East Region  ka la dawa ba ki bor sorkar ki dei ban aiti ia ka jingtohkit ha ka tnad CBI ban wad ia ka jingsha pyniap ka kong Victoria D Kharkongor hapoh Police station ha Dispur, Assam.
U Bah Dibishon Malai u  Convenor NH RC u la ong ba ka seng kan leit iakren ia ki bor sorkar halor kane ka jingjia bad ban dawa ba dei ban aiti ia ka jingtohkit sha ka CBI khnang ban lap ia ki jingshisha halor ka jingiap kane ka longkmie.
Ka Kong Victoria Dayoun Kharkongor, la kynnoh ba ka la phasi hi ialade ha painkhana ha Police station ha Dispur  ha ka sngi u Blei.
Kiba ha iing hasem bad ka Kur Kharkongor kin leit rah ia kane ka jingjia sha ka National Human Rights Commission (NHRC) ban dawa ban thung da ka  Magisterial Inquiry. Ka National Human Rights Council of India (NHRCI), North East Region, ka la dawa na ka Sorkar Jylla ban aiti ia ka jingtohkit CBI halor kane ka jingjia bad ka la pynrem jur ia ka jingleh jong ki pulit ka Dispur. Ka NHRCI ka la ong ba ki pulit ka Dispur ki la pynkhein ia ka ain da kaba kem ia ka kynthei briew ha ka por mynmiet kaba long pyrshah ia ka ain ba la buh da ka Supreme Court.
Ka NHRCI ka la dawa ruh ba ka Sorkar Assam ka dei ban siew ia ka bailutksan sha ki bahaing jong kane ka longkmie.