Ki para jongnga, ki la heh la san bad ki la ioh kyrdan PhD, nga tip, ia kaei ka sien jam ba kin jied, ong U Bah RG

Shillong:U Myntri kam pohing barim jong ka sorkar jylla, u ba long ruh u nongialam ka seng Congress, u bah RG Lyngdoh mynta ka sngi u la pynthikna ba na ka liang jong u,un ym treh shuh ban ieh ia ka party Congress, namar ba u shaniah ha ka rukom trei kam jong ka party.

Kane ka kyr woh ka ba la mih na u bah R.G Lyngdoh ka long hadien ba la mih ka khubor ba na ka liang ka kong Ampareen Lyngdoh bad ka kong Jasmine Lyngdoh, ki lah ban leit ban pyniasoh noh ialade bad ka party National People Party.
“Ki para jong nga ki la heh la san bad ki dei ruh ki briew ki ba la nang la stad palat ban ia nga, baroh arngut ki dei kiba la ioh ia ka kyrdan PhD, te nga ngeit skhem ba ki tip ia kaei ka sien jam kaba kin jied”u la ong.

U la bynrap shuh shuh “Kim dei ba kin hap ban jubab ia nga hynrei kin hap ban jubab ia u paidbah u ban thep vote, ka election ka la jan bad kan shong ha ki paidbah hi ba kin rai, la kin jied ne kyntait ia ki”.
“Ha kaba ia dei bad nga, nga la noh ka rta ban ryngkang na uwei u dieng sha uwei u dieng nga la wan phai sha ka party Congress namar ba nga shaniah ha ka principles jong ka party”la ong u bah Lyngdoh.
U la bynrap shuh shuh “Ha u snem 2008 nga khlem ieh ia ka party hynrei ki dei ki nongialam jong ka party ha kato ka por kiba la suspen ia nga bad ka daw ki tip bha ma ki”.

“Wat la ha jrong ki lah ban ong ba, kim sngewbha ia ki katto katne ki jingkdew jong nga pyrshah ia ka jingtreikam jong ka AICC ha ka to ka por”u la ong.
“Hynrei mynta nga la wan phai sha ka party ban kyrshan bad ia lam ia ka party mynta bad ka la long kaba eh ia nga ba ngan ieh ia ka party mynta, hynrei nga burom ia ka rai jong ki para jong nga bad nga kyrmen ba ki para jong nga ruh kin burom ia ka rai jong nga”u la bynrap.