Mynsaw 2 ba tyngkhuh kali

Shillong,12 Naitung:
Mynta ka step ha ka por 10:40 baje eiei kawei ka kali Wagon R kaba don ia u nombar ML. 05E 762 ba la niah da u Kitborlang Khongjoh ba na Mawlai Nonglum Block I, kaba dang wan na ki thain Sohra ban leit sha Shil long ka la ia tyngkhuh bad kawei pat ka kali Maruti Car kaba don ia u nombar ML 05E 9141 ba la niah da U Kumar Rai ba na Nongsder, Umiam uba dang wan na ka liang ba mar pyrshah.
Katei ka jingjia ka la jia ha Sohrarim ha ka surok bah ban leit sha Sohra, ha kaba katei ka jingjia baroh ar tylli ki kali ki la julor bad ar ngut ki briew kiba shong ha katei ka Maruti car kaba dei ka kali kamai ki la mynsaw jur, kiba la mynsaw ki dei kiba la tip kyrteng kum u Abhishek Kumar Gupta bad ka Kamla Gupta kiba dei na 401NML Flat Agrico Jamshedpur, Jharkhand, la pynkit ia kitei baroh ar ngut sha PHC Laitryngew hynrei kham hadien la pynkynriah noh da ka kali 108 sha Civil Hospital, Shillong.
Ki pulit ki dang tohkit ban tip mano ba bakla ha katei ka jingjia, hynrei ka khubor na ki pulit ka la iathuh ba katei ka jingjia ka la jia namarba ka la don ka jingdum lyoh kaba rben ha ki surok ka thain Sohra mynta ka sngi bad baroh ar tylli kitei ki kali kiba wan na mar pyrshah ki iaid hapdeng surok, ba la pynlong ban mih katei ka jingjia ia tyngkhuh.