Shillong:Ka National Peoples Party (NPP) myn hynnin ka sngi ka la pynthikna ia ki ar ngut ki kyrtong ki ban ia khun ia ka election 2023, na ka party NPP bad kitei ki long, ka kong Macdalyne Sawkmie Mawlong ka ban ia khun na Nongpoh Constituency bad u bah Martin M Danggo na Ranikor Constituency.
Mynta ka sngi na ka liang U Myntri Rangbah ka jylla u ba long ruh u National President ka National People Party, U Conrad K Sangma ha ryngkat ka jingiadon lang u President ka party u bah WR Kharlukhi, symbud Myntri rang bah u bah Prestone Tynsong, ki la pdiang sngew bha ia ka jing rung party u MLA ba rim ka Ranikor Constituency u Martin M Danggo, ka kong Macdalyne Sawkmie Mawlong MDC ka Umsning Constituency, ha ryngkat ki nongialam na Nong poh Ri Bhoi District, u CEM barim ka KHA DC u bah Manstudy Nongrem,U bah Hembertus Nongtdu,u bah Thomas Nongtdu, ka kong C. Shylla,u bah Defender Pakiang bad kiwei kiwei ki nongialam ha ophis treikam jong ka party NPP.
Haba ia kren ha kane ka sngi, u myntri rangbah ka jylla, u Conrad K Sangma, u la ong ba ka jingwan ban pyniasoh jong kiba bun ki nongialam na kiwei ki party hi ka long namar ba ki la iohi ia ka jingshim khia jong ka sorkar MDA kaba la ialam da ka party NPP ban weng ia ki jingeh jong ki nongshong shnong kiba la sah kut da ki phew phew snem.
U la ong ruh ba ia kiba bun ki jingeh yn dang iaid bteng ban trei bad lada ki nongshong shnong ki dang bteng ban ai ka jingkyrshan ia ka party NPP ka party kan dang iaid shakhmat ban trei ia kiba bun ki kam kiba ngi la sdang bad ban pynlong ia ka jylla ka Top Ten State ha kine ki 10 snem ki ban sa wan.
Haba kren ha kane ka sngi na ka liang u Symbud Myntri rangbah ka jylla u bah Prestone Tynsong, u la ong ba da ka jingwan rung jong ki nongialam sha ka party NPP ka party kan ialeh katba lah ban pynioh ban thaw sorkar tang marwei ha u snem 2023.
“Kane kam mut ba ngin ieh beit ne bret bein ia ki party ba synrop lang ha ka Sorkar MDA, hynrei ka party ka kwah ban pynioh 32-33 tylli ki seat ha ka jylla baroh kawei “u la ong.
U la bynrap shuh shuh “Ngi pdiang sngew bha ia ki nongialam ki ba la wan ban rung sha ka party ha kaba ngi la dep ban pynbeit ba na ka bynta u snem 2023 ka kong Macdalyne Sawkmie Mawlong kan long ka kyrtong ban aireng na Nongpoh Constituency bad u bah MM Danggo un aireng na Ranikor Constituency, ha kaba ngin sa thaw ia ki Block Committee ka ban kynthup ia ki dkhot kiba rim bad kiba thymmai ba kane ka party kan khlain”.
Ka dei bah