“Ngam ju tip, ba nga hap ban pan tiket, nga dei uba don bynta ban seng ia ka UDP”

Shillong:U bah Bindo M Lanong u nongialam rangbah ka United Democratic Party (UDP) u la ong “Ngan rkhie kum ba rkhie mynta, lada ka mih kum kane ka jingia knieh tiket hapdeng jong nga u ba la seng ia ka party UDP bad u briew u bym dei na ka party”.

Lah ban kdew hangne ba na ka liang ki nongialam jong ka UDP Nongkrem circle ha ki ne ki khyndiat sngi ki la pynpaw ban kyrshan ia u bah Lambor Malngiang u MLA ka Nongkrem Constituency katba na ka liang u bah Bindo M Lanong u la pynpaw, ba un ialeh ia ka election 2023 na Nongkrem Constituency.

U bah Lanong u la ong “Balei ki pynmih ia ka kyrteng jong u bah Lambor Malngiang ban ia khun na ka party UDP”u la bynrap ruh “Kita ki ba kam ba ki dei ka UDP unit na Nongkrem ruh nga don ka jingartatien ba kin dei ki nongkitkam shisha na ka party UDP” .
U bah Lanong u la ong “Lada ki dei ki nongkitkam ka party UDP ki dei ban kyrshan ia u briew na ka party, balei kin iaid bad u briew u ba don shabar ka party, ngin hap ban wad jingtip ba ki dei kiei kine ki briew kiba kam ia kane”.

U la bynrap shuh shuh “Wat haduh mynta na ka liang ka UDP unit na Nongkrem ki khlem pyntip eiei ia nga haba ki la tip ba nga la pynkhreh ban ia khun ia ka election 2023 na Nongkrem Constituency”.
U bah Bindo u la ong ruh “Haduh mynta hi ngam pat pan tiket na ka party bad ngam ju tip ruh ba ngan hap ban pan tiket namar ba nga dei uwei na kiba don bynta lang ban seng ia ka party UDP, hynrei lada ki ong ba nga donkam ban pan tiket ngan pan ia kata”.
“Wat la nga la dei uba la slem tam ha ka party, hynrei kine ki ba wan mynta kiba dang shu pyniasoh ha ka party ki kwah ban pynbor ia nga ba nga donkam ban pan tiket ngan leh ia kata katkum ka kyndon ba don ha ka party “.

Haba kylli halor ka rai ba u kwah ban ia khun na Nongkrem Constituency u bah Bindo u la ong “Ka daw hi ka long ba ki bymdei trai jylla (non-tribal) kim ju ai vote ia ki party riewlum ha ka ba ki ju jied tang ia ka national party kumta nga la jied ia ban ia khun na Nongkrem Constituency”.
Haba kylli ba u dei u nongseng ia ka party hynrei lada ki nongialam kim ai tiket, u bah Lanong u la ong “Ngan rkhie kumba nga rkhie mynta ba nga dang shu pyrkhat ruh ia kane namar ba ngam lah ban pyrkhat ba ia u briew u ba la long rangbah ha ka party ngan hap ban mad kita”.
“Wat la u Bah Lambor Malngiang u dei u MLA mynta hynrei u ta u MLA um dei u briew jong ka party UDP bad lada u dei tang u ba la pyniasoh bad ka party ruh, ngan jin da pyrkhat ar sien ia kane, bad lada kiwei ki MLA shimet ki lah ban pyniasoh ia lade kan eh aiu ia u bah Malngiang ban pyniasoh bad ka party kane ka long kumba ia kren halor u briew u ba la seng ia ka UDP bad ia u briew u ba khlem treh ban pyniasoh bad ka party mynta ka jan kut ka samoi trei kam ruh”la ong u bah Lanong.