Mih ka JACAMFU, ban iakhun ia ki jingeh ki nongrep ha ka jylla

Shillong, 9 Naitung:
Ka Hills Farmer’s Union (HFU) mynta ka sngi ka la khot pynlong ia ka jingialang jong ki nongrep bad kumjuh ruh ki seng nongrep bapher bapher ha ka jylla bad la thaw ruh ia ka seng synrop lang jong ki seng nongrep kaba la tip kum ka Joint Action Committee of All Meghalaya Farmer’s Union (JACAMFU).
Ha kane ka Joint Action Committee jong ki seng rep ki kynthup ia ka seng Hill Farmer’s Union, Riwar Sepngi Farmer Association, ka Seng Nongrep Synroplang Ri-Bhoi District bad ka Warsan Lyngdoh Farmer Association West Khasi Hills.
Ka jingthmu jong kane ka seng ka long ban iatreilang na ka bynta ban iakren ia kiba bun ki ishu kiba dei na ka bynta ki nongrep hapoh ka jylla baroh kawei. Ha kane ka sngi la jied ruh ia ki nongkitkam kiba thymmai jong ka JACAMU ha kaba la jied ia u bah Commander Shangpliang uba dei na ka thaiñ Mawkyrwat kum u Chairman, Vice Chairman bah K Suting, General Secretary bah BL Nongum, Assistant General Secretary bah Arnes Myrthong, Organising Secretary bah Erik Syiemlieh, Finance Secretary bah W Lytan bad la jied ruh ia ki Adviser kiba kynthup ia u bah L Manner bad bah K Kurbah.
Na ka liang jong ka Joint Action Committee shen kan sa pynlong ia ka jingialang ban iakren ia kiba bun ki ishu kiba ktah ia ki nongrep bad hadien kane yn sa leit ban pynsngew sha ki bor sorkar bad ka seng ka wer ia ki paidbah nongrep bad ki seng nongrep bapher bapher ha ka jylla ba kin iatreilang halor kane ka bynta bad ki lah ruh ban phone ha u number 9863512121 lane 8575040707.