Ba khyrwit u Corona, tyrwa die u trai ia ka bos, tang T.45 shi kilo

Kochi:Ka kamai kajih jong ki nongbuh kali, ka la hiar shi katdei, ha kine ki sngi ha Kerala, na ka daw jong ka jingtrei jubor jong ka khlam Corona.

Katei ka jing duh nong, kaba la ktah jur, ia uwei na ki nong pyniaid bos ha Kerala, ka la pynbor ia u, ba un tyrwa die noh ia ki bos jongu, tang ha ka dor T.45 shi kilo.

Katei ka dei ka bos jong uwei na ki trai, pyniaid bos, kaba don ha ka seng Contract Carriage Operators Association Kerala (CCOA) bad kaba pyni, ia ka jinghiar kyrthep ka kamai kajih jong ki bos bad kaba la pyniap ia ki trai kali, ki nongniah bad ia ka tnat shang pyrthei baroh kawei ha Kerala.

U Royson Joseph, uba dei u trai jong ka Roy Tourism, u dei uba don 20 tylli ki bos, hynrei, ula die noh ia 10 tylli ha ki shisnem tam ba ladep, na ka daw ba ka kamai kajih, ka la hiar jubor ha kine ki sngi. Ha ki saw sngi ba ladep, u iathuh ba ki don tang 3 tylli ki bos jongu, kiba leit kamai sha Munnar, kaba ju dei ka por, ba ka kamai kajih jong ki bos, ka kiew bha, ha kum une bnai.
U Royson, ula die shiphew tylli ki bos, ban siew ia ka ram hapoh Bank. Mynta u la tyrwa shuh ban die ia kitei kiba sah bad u ong “Nga la rai ban die ia kino kino kiba kwah ia ki bos kiba dang don bad nga, ha ka dor T.45 shi kilo. Ka jinglong jingman ka kamai kajih, ka la hiar shaba palat bad ki don bun bah ki nongkamai bos, kiba lah ban pyniap no ialade” ula ong shuh shuh.
U Binu John, President ka CCOA, u iathuh ba ka jingdon ki bos, na ka 14hajar tylli, ka la hiar mynta sha ka 12 hajar tylli, naar ba ki la bun kiba la shah tan, na ka daw, ba kim lah ban siew ia ki ram ki shah jongki. “Ha ki ar bnai ba ladep, ki don haduh shi hajar tylli ki bos, kiba la shah tan ha ki Bank” ula ong shuh shuh. La iathuh shuh shuh, ba hadien U Lber 2022, yn sa ioh ia ka khubor kaba shai bha, tangba ula antad, ba kin don kumba haduh 3hajar tylli ki bos, ki ban shah tan noh, ha ki Bank bad ha ki nongai ram pisa bad ula kynnoh ba ka jingeh kaba khraw, ka dei namar ka jing kylla kaba man ka por jong ka ain iada covid jong ka sorkar jylla. Nangta u iathuh shuh shuh, ba ia ki bos kiba iaid kamai ha ka sngi U Blei, ki shah dain kuna T.2hajar ia kawei ka bos, ha ki pulit bad katei ka la buh jingeh kaba khraw ia kiba kamai bos, nalor ba ki hap siew ia ki khajna kiba heh ha kine ki sngi.