Yn pan jingshai ka BJP na U Conrad, ba u khot iatreilang ia ki Congress

Shillong:Ka BJP, kam don kano kano ka jingsngew pyrshah, halor ka jingleit kyrshan jong ki 5ngut ki MLA jong ka seng Congress, ia ka sorkar MDA, namar ba katei kan nang pynjot thiaw hi ia ka jinglong jing man jong ka seng Congress.

Ka seng, ha kawei pat ka liang, ka kwah ban tip, ia ka daw, ba U Conrad Sangma, myntri rang ba ka jylla, ula shu pdiang ia kitei ki 5ngut ki MLA, khlem da ia syllok shwa bad ka BJP, kaba dei ka kynhun synrop, ha shwa ba un pdiang ia ki MLA jong ka seng Congress, ba kin don lang bad ka sorkar.

U Incharge jong ka Bharatiya Janata Party (BJP) ba dei peit ia ka jylla Meghalaya uba long ruh u National Vice President u Dr. M. Chuba Ao, u la kyntait ban weng ka jingkyrshan na ka sorkar Meghalaya Democratic Alliance (MDA) hadien ba ki MLA jong ka Congress ki la wan ban pyniasoh ia lade bad ka sorkar MDA.
Haba kren ha ki lad pathai khubor u Dr M Chuba Ao u la ong ba ka rai kaba la shim ban ym weng ia ka jingkyrshan na ka sorkar MDA u la ong ba yn ym lah ban weng ia lade na ka jingpyniasoh jong kano kano ka party, namar ba ka jingwan pyniasoh hi ha ka sorkar kan pynkhlain ia ka sorkar.

U la ong ruh ba ka BJP kam don jingwit eiei na ka jingpyniasoh jong ki MLA ka Congress namar ba dei ka Congress ka la wan ban kyrshan ia ka BJP, ym ka BJP kaba leit ban kyrshan ia ka Congress la kane ka jingwan kyrshan kan dei na ka daw ba ka Congress ka la tlot ha ka jylla.
U Ao u la ong “Ki MLA jong ka Congress kiba la wan ban kyrshan ia ka sorkar MDA ki la wan kum ki dkhot shimet bad kaei ka ba ka party jong ki kan rai halor kane ka jingshim rai jong ki MLA jong ki ka dei ka kam hapoh ka party jong ki”.
U Chuba Ao u la ong ba ha kane ka jingwan kyrshan jong ka party Congress ia ka sorkar MDA na ka liang ka Party BJP ka ba long ka party ba synrop lang ha ka sorkar, ka la khmih lynti ba u Myntri rangbah un pyntip lang ia ki halor kane ka bynta hynrei u la lehklet ia kane.
“Halor kane ka bynta, ha ka jingialang kaba la long mynta ka sngi ngi la rai ba ngin thoh da ka shithi sha u Myntri rangbah ba un pynshai lang halor kane ka bynta namar ba ngi don ia ka hok ban tip ia ka jinglong jingman ha ka sorkar MDA” u la bynrap.
U Bah Ernest Mawrie Sate President jong ka BJP u la ong ba ha kane ka jingialang jong party, ba la wan ban ia shim bynta da ki ar ngut ki MLA, u National Secretary, la shim ia ka rai ban thoh da ka shithi sha u myntri rangbah ban pan jingpynshai halor ka jingbym pyntip jong u ia ka jingwan kyrshan ka Congress ia ka sorkar MDA.