Uwei u nongrep hapoh ka kynhun PG un ïoh T. 5 hajar, ong U Conrad

Shillong:U Myntri Rangbah ka jylla u Conrad K Sangma ha ka Sngi Thohdieng u la ong ba ka sorkar MDA ba la ïalam da ka NPP ka la plie ïa ka prokram thymmai na ka bynta ka roi ka par ki nongrep, ka FOCUS ka ban long ka jing myntoi ïa palat 4.5 lak ngut ki nongrep ha ka jylla.

U la ong ba ka prokram la sdang da ka sorkar jylla haba pyrkhat ïa ki jingeh ba ki nongrep ki kynduh na ka daw ka khlam Covid-19.
U la ong ba lyngba kane ka pro kram ïa ki nongrep la pynlong kynhun ba la khot da ki “Producers Groups” (PG) bad ka don ka jingïarap pisa kaba long T. 5000 sha manla uwei pa uwei u dkhot ka kynhun.
U la ong ba katei ka jingïarap kan long kum ka pisa tynrai ban kyntiew ki kam rep.

Lah don ka jingmang pisa kaba T. 200 klur na ka bynta kane ka prokram. Ha ki lai bnai ba la dep, u Myntri Rangbah ka jylla u la leit jngoh ïa kiba bun ki distrik bad ki block ha ka jylla.
Katba ha ka prokram FOCUS kaba la long ha Chokpot ha ka sngi Thohdieng, u Myntri Rangbah u la sam ki cheque ba la haduh T. 1.2 klur sha ki 170 tylli ki Producer Group ban kyntiew ïa ki kam rep bad ki kam aikam aijam.
U Myntri Rangbah u la shimbynta ruh hapoh ka SHG Mela ha kajuh ka jaka bad u la pynnoh ka jingïarap pisa kaba shongdor T. 1.001 klur sha ki 29 tylli ki seng Shnong bad SHG. U la ong ba ka sorkar MDA ka kmen ban kyrshan ïa ki SHG ba la ïalam da ki longkmie kaba aibor ïa ki longkmie ban long kiba aikam aijam naduh tynrai.

U la ong ba ka sorkar ka pynshlur ïa ki kam aikam aijam. U la pynshlur ïa ki paidbah ban shim kabu ïa ki kam pynroi ba la plie da ka sorkar bad pynkhih ïa ki paidbah ban thaw ki Self Help Group bad Cooperative Society ban ïoh ki jingmyntoi jong ka skhim.
U la pynbna ruh ba kumba T. 100 klur lah mang na ka bynta kiba bun ki kam pynroi bad ki projek ha ka thaiñ Chokpot, ka South Garo Hills, kynthup ïa ka Chokpot Water Supply, Guest House, new Civil Sub Division building bad ka surok na 12 mer sha Chokpot.
La sam ruh ïa ki Clean Cookstove hapoh ka jingsdang ka CSR jong ka Global Himalayan Expedition, ba la sam sha ki nongïoh myntoi ha ka prokram.