Khih bitar ka BJP, ia ka NPP, na ka daw ka Congress

Ka jing iatreilang ka sorkar MDA bad ka seng Congress, ka la pynkhih bitar ia ka BJP ha kine ki sngi bad ngim tip, ia kaei ka jingthmu kaba don ha katei ka seng, kaba heh duh jong ka India, hynrei ngi tip shai, ba ka BJP, kan nym lah ban ia don lang ha kajuh ka sem bad ka kynhun tukde tukde gang, kumba ong U Modi.

U Conrad K Sangma, ula iatreilang bad ka seng BJP, da ki phew phew snem bad kan eh aiu, ba un pynkut sa ia kane kaba shisnem duna, ban ksoh ha ki khohwah ba khlain bor jong katei ka seng, na bynta ban pyndep ia ka roi ka par, kaba u paidlang ka jylla u dei ban ioh.

Ngi iohi, ha kine ki sngi, ba u pyneh tyrpeng marwei marwei ban hiar khah khah sha Manipur, na ka bynta ka elekshon MLA ha katei ka jylla, da kaba u kren kob, ba katei ka seng, kan khur ia ki 10 khlieh shaneng (two digits) bad katei ruh kam don jingwit eiei satia, hynrei, ha kaba iadei bad ka Meghalaya, ula dei ban kham tyngkan, namar ba ka jylla, ka donkam kyrkieh ia u pud u sam uba biang bad ka Assam, ka jing pyllait dewiong; ka ILP, ia ka jing thaw thymmai ia ka 6th Schedule, ia ka jing ithuh ia ka ktien Khasi bad nangta sa ki kam pynroi kiba rynrain, kiba ki hap ban leit rah bowl sha Delhi khah khah, na ka bynta ban wan kob sob ia ki kam pynroi jongki sha u paid ka jylla.

Ngin dang ia peit, ia kaei ka ban jia ha kine ki sngi, ki ban wan, hynrei kane ka dei ka kabu kaba biang tam ia ka seng BJP, ba kan mih noh na ka sorkar NPP bad hangta, kan ioh lad ban syllad bad ka mon bad ka diang pyrshah ia kane ka sorkar MDA ha ka jylla bad ba kan pynkhreh noh ialade, ia ka elekshon MLA 2023.
Ki pyrman sain pyrthei, ki lah ban buh la ki jong ki jingkhein bapher, hynrei U Conrad Sangma, ula dei ban sngewnguh ia ka seng BJP, kaba dei ka seng kaba pyndap pynbiang ia ka sorkar jylla bad lada u thrang dik dik ban lum ia ki 5ngut ki MLA, ula dei ban bthah ia ki, ba kin shim, da kajuh ka buit jong ki 12ngut bad kata ka long, ba kin mih noh na ka seng Congress bad ba kin iasoh ialade sha kano kano ka seng sain pyrthei, kaba ki sngew bit bad tang katta, ka Congress, ka la wai ka iew bad ka jing ia kynad ruh, kan nym jia satia hapdeng ki paralok MDA.