Kyntait ka KHADC ia ka Village Council

Shillong:U Chief Executive Member ka KHADC, u bah Titos W Chyne u la iathuh ba na ka liang jong ka Council hi kam pdiang ia ka rai jong ka kynhun myntri halor ka jingpynkylla ia ka 6th schedule ha kaba ia dei bad ka jingthaw ia ka Village Council.

Haba ia kren bad ki lad pathai khubor na ka liang u bah TW Chyne u la ong “Ha ka jingialang jong ka UDA ka ba la long mynta ka sngi la shim ia ka rai ban ym treh ban pdiang ia kano kano ka jingpynkylla ia ka riti dustur jong ngi”.
U la ong ba halor kane ka rai ba la shim da ki kynhun myntri na ka liang ka UDA, kan sa pan jingshai halor ka Village Council kaba ka sorkar jylla ka thmu ban wanrah ba ka long ne em katkum ka jingthmu ka Home Ministry.
U la ong ba “Ka jingpynhap ia ki 10 tylli ki shnong ha kawei ka Council ha ka ba tang uwei u rangbah shnong un long u Chairman kane kam long ban mynjur namar ba kan wanrah ia ka jingkulmar ha ka synshar khadar kaba long katkum ka riti durtur”.

U la pynpaw ruh ba halor kane ka jingpyrshah na ka liang ka Council ka la dep ruh ban pynpaw sha ka sorkar “Ngi la dep ban pynpaw ba ia ka Village Council ngim treh namar ba kan wanrah ia ka jingkulmar hapdeng ki dorbar shnong”.
Na ka liang jong u CEM, u la iathuh ba halor kane ka bynta na ka liang jong ka Council, kan sa leit ban ia kynduh ia u Myntri rangbah ka jylla u Conrad K Sangma.