Ka jingieid jaitbynriew, kam dei ban pyni, da ka jing umsnam, ong U SMR

Shillong:U Bah Prestone Tynsong, symbud myntri rangbah (SMR) ka jylla u la kyntu ia ki kmie ki kpa ba ki dei ban shim ia ka jing kitkhlieh ba kin ialam ia ki khun samla sha ka lynti ka ba dei bad ruh u kyntu ia ki khun samla ba kin kiar na kano kano ka lynti ban ia umsnam namar ba kane kam dei ka lynti ban pynpaw ba ki ieid ia ka ri bad ka jaitbynriew.
“Na ka liang ka sorkar ka kyrpad ia ki khynnah samla ba kim dei ban sngewthuh bakla ba ka jingieid ia ka ri bad ka jaitbynriew ka don bun ki syrtap, haba ki ong ba ki ieid ia ki jait bynriew, ym dei ban pyni lyngba ka jingiaumsnam” la ong u symbud myntri rangbah.

U la kyntu ia ki khun samla da ka ba ong “Kaba nyngkong hi ia ki khun samla ka long ba kin sngewthuh ba ka long kaba donkam ban pynkhlain ia la ki kjat lajong khnang ban lah ban tei ia ka ing ka sem ka shnong ka thaw bad ia ka ri bad ia ka jaitbynriew”.
Na ka liang u Symbud Myntri rangbah, u la kyntu ruh ia ki ki kmie ki kpa ba ki dei ban shim ia ka jingkitkhlieh ba kin ai ia ka jingmut jingpyrkhat ia ki khun ba kane ka lynti ka dei kaba bakla, ban pynpaw ia ka jingieid ia ka Ri bad ka jaitbynriew.

“Ka juk mynta kam dei shuh kum ka juk mynshwa ha kaba na ka liang ki kmie ki kpa kin hap ban kitkhlieh lang ban hikai ban pynthikna ba ki khun jong ngi kin ym shah ia lam bakla ha kum kine ki jingmut jingpyrkat ba bakla” u la ong.
U bah Tynsong u la ong ruh “Ha kaba khadduh hi, da kaba ki leh ia ki kam pyntriem ha ka jylla kam wanrah ia ka jingmyntoi ka don tang ka duhnong suda bad ka shu pyntieng ia ki nongshongshnong”.

U Symbud Myntri rangbah u la bynrap shuh shuh ba na ka liang jong ka ain kan dang leh ia kaba donkam ban tehlakam ia kum kine ki jingjia, khnang ba kan ym ktah shuh ia ka iap ka im jong ki nongshong shnong.
Halor ka jingkynnoh ka liang pyrshah, u bah Prestone u la ong ba ki liang pyrshah ki dei ban bishar bha shwa ban kren eiei, halor kane ka bynta namar ba ka tnad kam pohing ka la leh ia ka ba biang tam ha kaba ia dei bad kane ka bynta.
“Lada ka tnad kampohing ka pheil kumno ka tnad ka la ioh ban kem ia baroh ki ba donkti ha kum kine ki kam pyntriem bad na ka liang ka sorkar ban pynneh ia ka shongsuk shongshngain ha ka jylla ki la bthah ia ka tnad ba kin long ki ba la pynkhreh ban ia khun ban tehlakam ia kum kine ki kam pyntriem”. U la bteng ruh “Nga ai ka jing iaroh ia ka tnad pulit kaba la trei shitom ban tehlakam ia kine ki kam pyntriem ha ka jylla”.

U Symbud Myntri rangbah u la kyntait ba ka tnad syntiat jong ka sorkar ka long kaba tlot ban tehlakam ia ki kam pyntriem ha ka jylla.
“Em kam don kano kano ka jingpheil jong ki tnad syntiat jong ka sorkar ha ka jylla, namar ba lada ka tnad ka tlot kin ym ioh ban kem ia baroh ki briew kiba donkti ha kum kine ki kam pyntriem kiba la jia ha ka jylla” u la ong.
“Ka tnad Syntiat jong ka sorkar ka dei kaba khlain bad kaba biang tam bad ngin dang pynkhlain shuh shuh ban pynthikna ba ki nongshongshnong ha ka jylla kin im hapdeng ka shong suk shongshngain”u la bynrap.