Pyndam ia ka jingsngew paidbah ka Star Cement, dawa ka FKJGP

Shillong:Myn hynnin ka sngi ka seng FKJGP-East Jaintia Hills District, ka la leit iakynduh ia u Deputy Commissioner (DC) jong ka East Jaintia Hills District, Khliehriat, na ka bynta ban pyrshah jur ia ka jing pynsngew paidbah jong ka Star Cement kaba la long ha ka 29/01/2022 ha Lumshnong.

Ka seng ka la dep ai da ka jingthoh sha ka Meghalaya State Pollution Control Board, Shillong bad ai copy ruh sha u DC jong ka East Jaintia Hills District. Ka jingpyrshah jur jong ka seng ia kane ka jing pynsngew paidbah jong ka star cement ka long halor ka nongrim ba ka Meghalaya State Pollution Control Board, ka khlem da pynmih khubor sha ki lad pathai khubor, khnang ba ki paidbah ba bun balang ba kin ioh jingtip khambha (information) na ka bynta kane ka jingsngew paidbah. Kane ka jingleh jong ka MSPCB ka long kaba pynduh lad ia ki briew, ban iashim bynta ha kane ka jingsngew paidbah, namar khlem da ai khubor sha ki kotkhubor.

Ka seng ka dawa na ka MSPCB lyngba u DC jong ka East Jaintia Hills District ba dei ban pynduh pyndam noh ia kane ka jing pynsngew paidbah, ba la long ha ka 29/01/2022, ong ka kyrwoh na U ma M Chyrmang, Information Secretary jong ka seng FKJGP-East Jaintia Hills District.